ৰঙালীৰ ৰঙত উখল-মাখল মাকুমকিল্লা

তিনিদিনীয়া কাৰ্যসূচীৰে অনুষ্ঠিত মাৰ্ঘেৰিটাৰ মাকুমকিল্লাত অবিভক্ত ডিব্ৰুগড় জিলা ভিত্তিত অনুষ্ঠিত ৰঙালী বিহু সন্মিলনৰ ৰূপালী জয়ন্তী উপলক্ষে উলিওৱা হয় এক বৰ্ণাঢ্য সাংস্কৃতিক শোভাযাত্ৰা । মুখ্যমন্ত্ৰীৰ প্ৰেছ উপদেষ্টা হৃষীকেশ গোস্বামীৰ লগতে অভিনেত্ৰী শ্যামন্তিকা আৰু তনভী শৰ্মাৰ অংশগ্ৰহণ ৷

মাৰ্ঘেৰিটা,26 এপ্ৰিলঃ বিভিন্ন জাতি জনগোষ্ঠীৰ লোকসংস্কৃতিৰ সমাহাৰেৰে মুখৰিত হ’ল মাৰ্ঘেৰিটাৰ মাকুমকিল্লা । তিনিদিনীয়া কাৰ্যসূচীৰে অনুষ্ঠিত মাৰ্ঘেৰিটাৰ মাকুমকিল্লাত অবিভক্ত ডিব্ৰুগড় জিলা ভিত্তিত অনুষ্ঠিত ৰঙালী বিহু সন্মিলনৰ ৰূপালী জয়ন্তী উপলক্ষে উলিওৱা হয় এক বৰ্ণাঢ্য সাংস্কৃতিক শোভাযাত্ৰা । মুখ্যমন্ত্ৰীৰ প্ৰেছ উপদেষ্টা হৃষীকেশ গোস্বামীয়ে উদ্বোধন কৰা এই শোভাযাত্ৰাত জনপ্ৰিয় তথা মোহময়ী অভিনেত্ৰী শ্যামন্তিকা শৰ্মা আৰু তনভী শৰ্মাই অংশগ্ৰহণ কৰে৷ দুয়োগৰাকী অভিনেত্ৰীৰ লগতে অসংখ্য লোকে পদব্ৰজে এই শোভাযাত্ৰাত অংশগ্ৰহণ কৰে ৷ শোভাযাত্ৰাৰ পাচতেই মঞ্চ মুকলি অনুষ্ঠান অনুষ্ঠিত হয় ৷ মুখ্য সম্পাদক সুনীল গুৰুং, সাধাৰণ সম্পাদক মনোজ ফুকনে আঁতধৰা অনুষ্ঠানটোত মৰাণ বিহু , বিহু হুঁচৰি পৰিৱেশিত হোৱাৰ লগতে জনপ্ৰিয় তথা মোহময়ী অভিনেত্ৰী শ্যমন্তিকা শৰ্মা আৰু তনভী শৰ্মাই বিহু নৃত্য পৰিৱেশন কৰে । উল্লেখ্য যে, অন্তিম দিনা মুকলি সভাত মুখ্য অতিথি ৰূপে মণিকুন্তলা ভট্টাচাৰ্যই অংশগ্ৰহণ কৰাৰ লগতে নিশা হ’বলগীয়া সাংস্কৃতিক অনুষ্ঠানত জনপ্ৰিয় শিল্পী জুবিন গাৰ্গ আৰু ভৃগু কাশ্যপে অংশগ্ৰহণ কৰিব ৷