অন্তিম যাত্ৰাত ছাত্ৰ নেতা পল্লৱজ্যোতি মৰাণ

দেওবাৰে এক পথ দুৰ্ঘটনাত সদৌ মৰাণ ছাত্ৰ সন্থাৰ কাকপথাৰ আঞ্চলিক সমিতিৰ সাঃসম্পাদক পল্লৱজ্যোতি মৰাণে মৃত্যুক আকোঁৱালি লয় ৷ দেওবাৰে এক শোকাকুল পৰিৱেশৰ মাজত সহস্ৰাধিক জনতাই অন্তিম বিদায় জনাই ছাত্ৰ নেতা জনক ৷

শদিয়া, 30 ডিচেম্বৰঃ ৰুদ্ধ হ’ল এটা জাতীয়তাবাদী সংগ্ৰামী কণ্ঠ ৷ দেওবাৰে অৰুণাচল প্ৰদেশৰ নামচাইত এক ভয়ংকৰ পথ দুৰ্ঘটনাত থিতাতে নিহত হয় সদৌ মৰাণ ছাত্ৰ সন্থাৰ কাকপথাৰ আঞ্চলিক সমিতিৰ সাধাৰণ সম্পাদক পল্লৱজ্যোতি মৰাণ ৷ এই দুৰ্ঘটনাত আন তিনিগৰাকী সতীৰ্থও গুৰুতৰভাৱে আঘাতপ্ৰাপ্ত হয় ৷

তথ্য অনুসৰি নামচাই পেট্ৰ'ল পাম্পৰ পৰা পেট্ৰ'ল ভৰাই উভতি আহোতে পল্লৱে বহি থকা মাৰুতি এল্ট গাড়ীখনে অৰুনাচল বিশ্ববিদ্যালয়ৰ সমীপত এখন ধান কঢ়িওৱা ট্ৰেক্টৰত খুন্দা মাৰে ৷ যাৰ ফলত ঠাইতে প্ৰাণ হেৰুৱাবলগীয়া হয় ছাত্ৰ নেতাজনে ৷ লগতে গুৰতৰভাৱে আঘাতপ্ৰাপ্ত হয় তেওঁৰ সতীৰ্থ আৰোহী সকল ৷ দুৰ্ঘটনা সংঘটিত হোৱাৰ পাচতে গুৰুতৰভাৱে আঘাতপ্ৰাপ্ত লোকসকলক ততাতৈয়াকৈ উন্নত চিকিৎসাৰ বাবে তিনিচুকীয়ালৈ প্ৰেৰণ কৰা হয় ৷

ইপিনে সোমবাৰে মৰনোত্তৰ পৰীক্ষাৰ পাচত পল্লৱৰ মৃতদেহটো কাকপথাৰ আঞ্চলিক মৰাণ ছাত্ৰ সন্থাৰ কাৰ্যালয়লৈ প্ৰায় দুই শতাধিক বাইক আৰু গাড়ীৰে এক বৃহৎ সমদল কৰি আদৰি অনা হয় ৷ কাৰ্যালয়টোত তেওঁৰ মৃতদেহত মাল্যাৰ্পণেৰে তেওঁক অন্তিম বিদায় জনোৱা হয় ৷ আনহাতে কাকপথাৰ CAA বিৰোধী প্ৰতিবাদস্থলীত আছু, যুৱ-ছাত্ৰ পৰিষদ, মটক, চুতীয়া ইত্যাদি দল সংগঠনৰ লগতে বিভিন্ন জনে অশ্ৰুসিক্ত নয়নেৰে অন্তিম বিদায় জনায় ছাত্ৰ নেতাজনক ৷ ইয়াৰ পাচতেই পোনে পোনে ছাত্ৰ নেতাজনৰ মৃতদেহটো তেওঁৰ নিজ গৃহ তেজিপথাৰ গাঁৱলৈ লৈ যোৱা হয় ৷ অতি অমায়িক আৰু ভদ্ৰ স্বভাৱৰ ছাত্ৰ নেতাজনক অন্তিম বাৰৰ বাবে এবাৰ চাবলৈ গাঁৱৰ হাজাৰ হাজাৰ লোকে ভিৰ কৰেহি ৷ সকলোৰে চকুত চকু পানী আৰু কান্দোনৰ ৰোলে সমগ্ৰ পৰিৱেশ শোকাকুল কৰি তোলে ৷

লগতে পঢ়ক - বৰপেটাত আৰম্ভ ২৯ সংখ্যক 'ৰংঘৰ ৰাষ্ট্ৰীয় নাট উৎসৱ'