সদিয়া, 24 মাৰ্চ :অৱশেষত ওলাল উৰহী গছৰ ওৰ ৷ বুধবাৰে আৰক্ষীৰ জালত পৰিল কাকপথাৰৰ সোণ চুৰিকাণ্ডৰ লগত জড়িত মাষ্টাৰমাইণ্ড (Kakopathar police arrest a gold thief) ৷ লগতে কাকপথাৰ আৰক্ষীয়ে আটক কৰিছে আন দুই যুৱকক ৷ ঘটনাৰ বিৱৰণি অনুসৰি, চলিত বৰ্ষৰ 17 ফেব্ৰুৱাৰীত কাকপথাৰ 1নং সৰু ডিৰাকৰ দিপ্তী মৰাণ চেতিয়া নামৰ মহিলাগৰাকীৰ বাসগৃহত সংঘটিত হৈছিল এক চুৰিকাণ্ড (Gold theft at Kakopathar) ৷
তাৰ পাচতেই ভুক্তভোগী মহিলাগৰাকীয়ে এই চুৰিকাণ্ড সন্দৰ্ভত কাকপথাৰ আৰক্ষী থানাত দাখিল কৰে এজাহাৰ ৷ এই এজাহাৰৰ ভিত্তিতেই চুৰিকাণ্ড সন্দৰ্ভত আৰক্ষীয়ে আৰম্ভ কৰে তদন্ত ৷ অৱশেষত প্ৰায় এমাহৰ তদন্তৰ অন্তত এই চুৰিকাণ্ডৰ লগত জড়িত থকাৰ সন্দেহত ডিৰাক আমগুৰি নগাঁৱৰ দিনেশ ফুকনৰ পুত্ৰ অনুপ ফুকনক আটক কৰে আৰক্ষীয়ে ৷ লগতে এই ঘটনা সন্দৰ্ভত দুই সোণাৰিকো সোধ-পোচৰ বাবে আটক কৰে কাকপথাৰ আৰক্ষীয়ে ৷