বৰফাকিয়াল গাঁৱক গৰাখহনীয়াৰ পৰা উদ্ধাৰৰ কৰিব পাৰিবনে বিধায়কে

অস্তিত্বৰ সংকটত ১২৪ নং মাৰ্ঘেৰিটা বিধান সভা সমষ্টিৰ কেটেতং গাওঁ পঞ্চায়তৰ অন্তৰ্গত বৰফাকিয়াল গাঁও ৷ তিনিশ বছৰৰো অধিক পুৰণি গাওঁখনৰ এক বৃহৎ ভূমিখণ্ড জাহ গৈছে বুঢ়ীদিহিং নদীৰ প্ৰৱল গৰাখহনীয়াত । যাৰ বাবে সৰ্বস্বান্ত হৈ সিংহভাগ পৰিয়ালেই গাওঁ এৰি অন্য স্থানলৈ স্থানান্তৰিত হৈছে । ইফালে বিধায়ক ভাস্কৰ শৰ্মাই গৰাখহনীয়া প্ৰতিৰোধৰ বাবে চৰকাৰে ব্যৱস্থা ল'ব বুলি আশ্বাস দিছে ৰাইজক ৷

মাৰ্ঘেৰিটা,8 মে'ঃ১২৪ নং মাৰ্ঘেৰিটা বিধান সভা সমষ্টিৰ কেটেতং গাঁও পঞ্চায়তৰ অন্তৰ্গত বৰফাকিয়াল গাঁও খন প্ৰায় অস্তিত্বৰ সংকটত । তিনিশ বছৰৰো অধিক পুৰণি এই গাঁওখনৰ এক বৃহৎ ভূমিখণ্ড বুঢ়ীদিহিং নদীৰ প্ৰৱল গৰাখহনীয়াত জাহ গৈছে । যাৰ বাবে সৰ্বস্বান্ত হৈ বেছিভাগ পৰিয়ালেই গাঁও এৰি অন্য স্থানলৈ স্থানান্তৰিত হৈছে । এনে সময়তে শুকুৰবাৰে এক বিশেষ কাৰ্যসূচীত উপস্থিত হোৱা বিধায়ক ভাস্কৰ শৰ্মাই গৰাখহনীয়া প্ৰতিৰোধৰ বাবে চৰকাৰে ব্যৱস্থা ল'ব বুলি সাংবাদিকক জানিবলৈ দিয়ে ।

গৰাখহনীয়া প্ৰতিৰোধৰ বাবে নদীৰ গতি সলনিৰ দৰে প্ৰচেষ্টা লৈছিল স্থানীয় বিধায়ক ভাস্কৰ শৰ্মাই । লগতে কৰা হৈছিল পাৰ্কুপাইনৰ ব্যৱস্থাও । কিন্তু ইমানৰ পাছতো প্ৰৱল ৰূপত অব্যাহত আছে গৰাখহনীয়া । তিনিশ বছৰৰ পূৰ্বে ব্ৰহ্ম দেশৰ পৰা অহা পিয়েতুন চেয়াডু নামৰ এজন বৌদ্ধ ধৰ্ম প্ৰচাৰকে এটি বৌদ্ধ মন্দিৰ প্ৰতিষ্ঠা কৰিছিল । গৰাখহনীয়াই এই মন্দিৰটোও প্ৰায় স্পৰ্শ কৰাৰ পৰ্যায়ত । টাইফাকে লোকৰ বসতিস্থল উক্ত গাঁওখনত থকা মন্দিৰটোৰ পুৰণি বৌদ্ধ মূৰ্তি বৰ্তমানেও শংকৰদেৱ কলাক্ষেত্ৰত সংৰক্ষিত । কিন্ত এই পুৰণি মন্দিৰটোক ঢুকি পোৱা নাই চৰকাৰী কোনো আঁচনি বা শেহতীয়াকৈ ৰূপায়ণ কৰা অসম দৰ্শন আঁচনিয়ে । বিধায়ক শৰ্মাই বৌদ্ধ মন্দিৰটোৰ আন্তঃ গাঁঠনিৰ বাবেও পুঁজি আৱন্টন দিব বুলি প্ৰকাশ কৰে । উল্লেখযোগ্য যে, মাৰ্ঘেৰিটা সাংবাদিক সংস্থাই অলপতে এই গাওঁ পৰিদৰ্শন কৰি গৰাখহনীয়া সমস্যাৰ বুজ লোৱাৰ লগতে ঐতিহ্যমণ্ডিত গাওঁখন ৰক্ষা কৰিবলৈ দাবী জনাইছিল ।