তিনিচুকীয়া, ২৮ ডিচেম্বৰ :তিনিচুকীয়াৰ ডিব্ৰু-ছৈখোৱা ৰাষ্ট্ৰীয় উদ্যানৰ গুঁইজান ঘাটত ওলাইছে এটা প্ৰকাণ্ড ঘঁৰিয়াল । ব্ৰহ্মপুত্ৰ নদীৰ বালিচৰত ঘঁৰিয়ালটো প্ৰত্যক্ষ কৰে ৰাইজে । লগে লগে এই খবৰ বিয়পি পৰে আৰু ঘঁৰিয়ালটো প্ৰত্যক্ষ কৰাৰ বাবে গুঁইজান ঘাটত ভিৰ লাগে অগণন ৰাইজৰ । উল্লেখ্য যে পূৰ্বতে অসমৰ নদীত ঘঁৰিয়ালৰ উপস্থিতি ধৰা পৰিছে যদিও ওচৰৰ পৰা চাবলৈ সৌভাগ্য হোৱা নাছিল ৷
কিন্তু পোন প্ৰথমবাৰৰ বাবে গুঁইজানৰ বালিচৰত প্ৰকাণ্ড ঘঁৰিয়ালটো ৰাইজে প্ৰত্যক্ষ কৰাৰ লগে লগে এবাৰ ওচৰৰ পৰা চাবৰ বাবে, ফটো উঠিবৰ বাবে ৰাইজে ভিৰ কৰা পৰিলক্ষিত হয় ।
প্ৰকৃততে তিনিচুকীয়াৰ ডিব্ৰু-ছৈখোৱা ৰাষ্ট্ৰীয় উদ্যানৰ গুঁইজান ঘাটত ওলোৱা ঘঁৰিয়ালটো সঁচা বা জীৱিত ঘঁৰিয়াল নহয় ৷ এই ঘঁৰিয়ালটো হৈছে এটা বালিৰে নিৰ্মাত ঘঁৰিয়ালহে । এই ঘঁৰিয়ালটো গুঁইজানৰ বালিচৰত ডিব্ৰুগড় জিলা শিক্ষা আৰু প্ৰশিক্ষণ প্ৰতিষ্ঠানৰ প্ৰশিক্ষাৰ্থীৰ এটা দলে বলুকা শিল্পৰে সাইলাখ সাজি উলিয়াছে ।