নামহোলুঙত প্ৰধানমন্ত্ৰী গ্ৰাম চড়ক যোজনাৰ পথ নিৰ্মানত অনিয়ম

প্ৰধানমন্ত্ৰী গ্ৰাম চড়ক যোজনাৰ অধীনত ২০১৮-১৯ বৰ্ষতেই প্ৰায় ২৫ কোটি ৪ লাখ টকা ব্যয় সাপেক্ষে ফিল'বাৰী নগাঁৱৰ পৰা তিনিআলি নগাঁৱলৈ নিৰ্মাণ কাৰ্য আৰম্ভ হোৱা এই পথচোৱা বৰ্তমান পৰ্যন্ত নিৰ্মাণ কাৰ্য সম্পূৰ্ণ নোহোৱাৰ অভিযোগ কৰিছে স্থানীয় লোকসকলে ।

তিনিচুকীয়া, 29 জুন : তিনিচুকীয়া জিলাৰ মাৰ্ঘেৰিটা বিধানসভা সমষ্টিৰ অন্তৰ্গত নামহোলুং বিজয়পুৰ গাঁৱত প্ৰধানমন্ত্ৰী গ্ৰাম চড়ক যোজনাৰ অধীনৰ পথ নিৰ্মানত ব্যাপক অনিয়ম সংঘটিত হোৱাৰ অভিযোগ উত্থাপিত হৈছে । প্ৰধানমন্ত্ৰী গ্ৰাম চড়ক যোজনাৰ অধীনত ২০১৮-১৯ বৰ্ষতেই প্ৰায় ২৫ কোটি ৪ লাখ টকা ব্যয় সাপেক্ষে ফিল'বাৰী নগাঁৱৰ পৰা তিনিআলি নগাঁৱলৈ নিৰ্মাণ কাৰ্য আৰম্ভ হোৱা এই পথচোৱা বৰ্তমান পৰ্যন্ত নিৰ্মাণ কাৰ্য সম্পূৰ্ণ নোহোৱাৰ অভিযোগ কৰিছে স্থানীয় লোকসকলে । আনহাতে নিৰ্মাণ কৰা অংশৰো অধিকাংশ স্থানত পথচোৱা জহি খহি যোৱা পৰিলক্ষিত হৈছে ।

পথ নিৰ্মাণকাৰী ঠিকাদাৰে নিম্ন মানৰ সামগ্ৰীৰে পথ নিৰ্মাণ কৰাৰ বাবেই পথছোৱা খহি যোৱাৰ অভিযোগ কৰিছে স্থানীয় লোকসকলে । বৰ্তমান ফিল'বাৰী-কৈলাশপুৰ সংযোগী পথৰ নামহোলুং গাঁৱৰ খহি যোৱা অংশ মেৰামতিৰ বাবে ওলাই আহিছে স্থানীয় পুৰুষ-মহিলাসকল । আনহাতে গাঁৱখনৰ ডুমডুমা নৈৰ ওপৰত থকা পকী দলংখনৰ সমীপৰ পথৰ এটা অংশও বাঢ়নী পানীয়ে উটুৱাই নিয়ে ৷ পথটোৰ নিৰ্মাণৰ ক্ষেত্ৰত তদন্ত কৰি উন্নত প্ৰক্ৰিয়াৰে পথ নিৰ্মাণ কৰিবলৈ বিভাগীয় কৰ্তৃপক্ষই আহ্বান জনাইছে স্থানীয় লোকে ।

লগতে পঢ়ক: বৰপেটাত বানৰ কবলত 1,35,415 গৰাকী লোক