তেজপুৰ, ২৫ নৱেম্বৰ: শোণিতপুৰজিলা প্ৰশাসনে ১৮ নৱেম্বৰৰ পৰা বৰ্ণাঢ্য কাৰ্যসূচীৰে আয়োজন কৰা মহাবীৰ লাচিত বৰফুকনৰ (Birth anniversary of Lachit Borphukan) ৪০০ বছৰীয়া জন্ম জয়ন্তী অনুষ্ঠানৰ আজি সামৰণি পৰে ৷ এই কাৰ্যসূচীৰ অন্তিম দিনটোত তেজপুৰৰ জিলা সংগ্ৰহালয় প্ৰাংগনৰ পৰা শোণিতপুৰৰ উপায়ুক্ত দেৱ কুমাৰ মিশ্ৰ প্ৰমুখ্যে জিলা প্ৰশাসনৰ সকলো বিষয়া-কৰ্মচাৰী আৰু বিশিষ্ট ব্যক্তিৰ লগতে একাংশ শিক্ষাৰ্থীয়ে উপভোগ কৰিলে প্ৰধানমন্ত্ৰী নৰেন্দ্ৰ মোডীৰ ভাষণ ।
জিলা সাংস্কৃতিক উন্নয়ন বিষয়া তথা জ্যোতি ভাৰতীৰ ভাৰপ্ৰাপ্ত বিষয়া জিতেন কুমাৰ দাস আৰু পংকজ বৰুৱাই আঁত ধৰা এই অনুষ্ঠানত মুখ্য অতিথিৰূপে অংশগ্ৰহণ কৰে বিশিষ্ট বুৰঞ্জীবিদ তথা বিশ্বনাথ মহাবিদ্যালয়ৰ অৱসৰপ্ৰাপ্ত অধ্যক্ষ ড০ নিত্যানন্দ গগৈয়ে ৷ তেওঁ ভাষণ প্ৰসংগত লাচিত বৰফুকনৰ জীৱন দৰ্শন আলোকপাত কৰে ।