বিজেপিয়ে অসাংবিধানিকভাৱে আটক কৰিছে 'কা'ৰ প্ৰতিবাদকাৰীক

দেশৰ বিভিন্ন প্ৰান্তৰ লগতে ৰাজ্যতো অব্যাহত আছে নাগৰিকত্ব সংশোধনী আইন বিৰোধী প্ৰতিবাদ । শনিবাৰে গুৱাহাটী মহানগৰী আৰু তিনিচুকীয়াত শতাধিক লোকে নাগৰিকত্ব সংশোধনী আইনৰ বিৰুদ্ধে প্ৰতিবাদ সাব্যস্ত কৰি উত্তাল কৰি তোলে ৰাজপথ ।

নিউজ ডেক্স, 1 ফেব্ৰুৱাৰী :সমগ্ৰ দেশৰ লগতে ৰাজ্যৰ বিভিন্ন প্ৰান্তত নাগৰিকত্ব সংশোধনী আইনক লৈ অব্যহত আছে প্ৰতিবাদ ৷ শনিবাৰে মহানগৰীৰ গুৱাহাটী ক্লাৱত কংগ্ৰেছ দলৰ ছাত্ৰ সংগঠন এন এচ ইউ আইয়ে আইনখনৰ বিৰুদ্ধে উত্তাল প্ৰতিবাদ সাব্যস্ত কৰে । ৰাজ্যত নাগৰিকত্ব সংশোধনী আইন বিৰোধী আন্দোলনত নিহত হোৱা যুৱক সকলক শ্ৰদ্ধাঞ্জলি জ্ঞাপন কৰি মই প্ৰতিবাদী কাৰ্যসূচী আৰম্ভণি কৰে । নীৰজ কুণ্ডাৰ নেতৃত্বত এন এচ ইউ আইৰ শতাধিক কৰ্মীয়ে প্ৰতিবাদী সমদল উলিয়াই বিভিন্ন চৰকাৰ বিৰোধী শ্ল'গানেৰে ৰাজপথ উত্তাল কৰি তোলে ।

প্ৰতিবাদস্থলীৰ পৰা এন এচ ইউ আইৰ সৰ্বভাৰতীয় সভাপতি নীৰজ কুণ্ডাই কেন্দ্ৰ আৰু ৰাজ্যৰ বিজেপি চৰকাৰক তীব্ৰ সমালোচনা কৰি কয় যে বিজেপিয়ে এই বিতৰ্কিত নাগৰিকত্ব সংশোধনী আইন বাতিল কৰিবই লাগিব । বিজেপিয়ে অসাংবিধানিক ভাৱে আটক কৰি জেললৈ প্ৰেৰণ কৰা ব্যক্তি সকলক চৰকাৰে অতি শীঘ্ৰে মুকলি কৰি দিব লাগে বুলি এন এচ ইউ আইৰ সৰ্বভাৰতীয় সভাপতি নীৰজ কুণ্ডাই মন্তব্য কৰে ৷ এই প্ৰতিবাদী কাৰ্যসূচীত এন এচ ইউ আই কর্মী সকলৰ লগতে অসম প্ৰদেশ কংগ্ৰেছ কমিটিৰ কেইবাগৰাকী নেতাই অংশগ্ৰহণ কৰে । নাগৰিকত্ব সংশোধনী আইন বাতিল নোহোৱালৈকে কংগ্ৰেছ দলে প্ৰতিবাদ অব্যাহত ৰাখিব বুলিও হুংকাৰ দিয়ে কংগ্ৰেছ কর্মী সকলে ।

আনহাতে নাগৰিকত্ব সংশোধনী আইন বাতিলৰ দাবীত সদৌ অসম ছাত্ৰ সন্থাসহ ৩০ জনগোষ্ঠীয় সংগঠনে তিনিচুকীয়াৰ মাকুমত মানৱ শৃঙ্খল কাৰ্যসূচী ৰূপায়ণ কৰে । মাকুম আঞ্চলিক ছাত্ৰ সন্থাৰ আহ্বানত আইনখন বাতিলৰ দবীত মাকুম-ডিগবৈ পথত সাব্যস্ত কৰে প্ৰতিবাদ । অঞ্চলটোৰ প্ৰায় তিনি শতাধিক প্ৰতিবাদী ৰাইজ পথৰ কাষত থিয় হৈ বিভিন্ন চৰকাৰ বিৰোধী শ্ল'গান দি উত্তাল কৰি তোলে পৰিৱেশ ৷ লগতে ছাত্ৰ সন্থাৰ নেতাই এই আইন কোনো কাৰণতে গ্ৰহণ কৰা নহ'ব বুলি হুংকাৰ প্ৰদান কৰে ৷

আৰু পঢ়ক : দেশব্যাপী বেংক ধৰ্মঘটঃ অসমতো বেংক কৰ্মচাৰীৰ প্ৰতিবাদ