অথঃ কয়লা সংবাদঃ কি ক'লে বিজেপি মুখপাত্ৰ সুভাষ দত্তই?

উজনি অসমত সংঘটিত কয়লা ছিণ্ডিকেট সন্দৰ্ভত কংগ্ৰেছ সাংসদ প্ৰদ্যুৎ বৰদলৈয়ে কৰা বিস্ফোৰক মন্তব্যৰ পাছতেই বিজেপিৰ ৰাজ্যিক মুখপাত্ৰ সুভাষ দত্তৰ প্ৰতিক্ৰিয়া ৷ সংবাদমেলৰ আহ্বান কৰি নেতাগৰাকীয়ে ছিণ্ডিকেট সংক্ৰান্তত দলীয় স্থিতি স্পষ্ট কৰাৰ লগতে সাংসদ প্ৰদ্যুৎ বৰদলৈৰ মন্তব্যৰ তীব্ৰ সমালোচনা কৰে ৷

তিনিচুকীয়া,3 অক্টোবৰঃ মুখমন্ত্ৰী সৰ্বানন্দ সোণোৱালৰ পৃষ্ঠপোষকতাত উজনি অসমত কয়লাৰ ব্যাপক হাৰত ছিণ্ডিকেট সংঘটিত হোৱা বুলি নগাঁৱৰ কংগ্ৰেছ সাংসদ প্ৰদ্যুৎ বৰদলৈয়ে অভিযোগ উত্থাপন কৰাৰ পাছতেই পুনৰ চৰ্চিত হৈ পৰিছে কয়লা ছিণ্ডিকেট প্ৰসংগ ৷ যাৰ পাচতে ৰাজ্যত জাঙুৰ খাই উঠিছে ৰাজ্যিক বিজেপি । বৃহস্পতিবাৰে তিনিচুকীয়া সাংবাদিক চৰাত অসম গৃহ নিৰ্মাণ পৰিষদৰ উপাধ্যক্ষ তথা ৰাজ্যিক বিজেপিৰ মুখপাত্ৰ সুভাষ দত্তই এক সংবাদমেল সম্বোধন কৰি কংগ্ৰেছী সাংসদ প্ৰদ্যুৎ বৰদলৈক উভতি ধৰে । উজনিৰ অবৈধ কয়লা সৰবৰাহ বন্ধ হৈ থকাৰ লগতে সকলো অবৈধ ব্যৱসায় বন্ধ কৰাত সোণোৱাল চৰকাৰ সফল হৈছে বুলি মন্তব্য কৰে বিজেপিৰ মুখপাত্ৰ গৰাকীয়ে । ইয়াৰ উপৰিও কংগ্ৰেছে ৰাইজক বিপথে পৰিচালিত কৰিবলৈ বিভ্ৰান্তিকৰ কথাৰে অপপ্ৰচাৰ চলোৱা বুলিও সংবাদমেলত অভিযোগ কৰে সুভাষ দত্তই ।

তেওঁ লগতে কংগ্ৰেছক কটাক্ষ কৰি কয়,"কংগ্ৰেছ এতিয়া ভেটিহীন, একমাত্ৰ সংবাদ মাধ্যমৰ যোগেদিহে কংগ্ৰেছে নিজৰ অস্তিত্ব জাহিৰ কৰে ৷" লগতে প্ৰাক্তন মুখ্যমন্ত্ৰী তৰুণ গগৈ আৰু সাংসদ প্ৰদ্যুৎ বৰদলৈ এতিয়া সংবাদমেল আহ্বানৰ প্ৰতিযোগিতাত অৱতীৰ্ণ হৈছে বুলিও সুভাষ দত্তই মন্তব্য কৰে ৷ ইফালে এতিয়ালৈকে কংগ্ৰেছ সাংসদ প্ৰদ্যুৎ বৰদলৈৰ মন্তব্যৰ ওপৰত কোনো প্ৰতিক্ৰিয়া প্ৰকাশ কৰা নাই মুখ্যমন্ত্ৰী সৰ্বানন্দ সোণোৱালে । পৰৱৰ্তী সময়ত মুখ্যমন্ত্ৰীগৰাকীয়ে কি মন্তব্য কৰে সেয়াহে লক্ষণীয় হ'ব ৷

• লগতে চাওক অথঃ কয়লা সংবাদঃ ''প্ৰব্ৰজনকাৰী মুছলমানৰ কোলাৰ কেঁচুৱা প্ৰদ্যুৎ বৰদলৈ''