তিনিচুকীয়া, 29 ছেপ্তেম্বৰ: ‘বাঘজানত বহি থকা TBK তৈল খাদটো সম্পূৰ্ণ অবৈধ ৷ এই খাদটোৰ নাই কোনো ধৰণৰ আইন সংক্ৰান্তীয় কাগজ পত্ৰ ৷’ মঙলবাৰে এক সংবাদমেলযোগে এই কথা সদৰি কৰিছে বাঘজান গাঁৱৰ মিলনজ্যোতি যুৱ সংঘৰ সদস্য তথা বাঘজানবাসী ৰাইজে ৷
আনহাতে, বাঘজান অঞ্চলত প্ৰবল গৰাখহনীয়াৰ ওপৰতো চৰকাৰৰ আজি পৰ্যন্ত কোনো ধৰণৰ গুৰুত্ব নাই বুলি উল্লেখ কৰে বাঘজান গাঁৱৰ মিলনজ্যোতি যুৱ সংঘৰ উপদেষ্টা মনোজ হাজৰিকাই । লগতে বিগত বৰ্ষ ২৭ মে' ২০২০ত বাঘজান BGN ৫ নং তৈল খাদত সংঘটিত হোৱা অভিশপ্ত অগ্নিকাণ্ডৰ পিছত অসমৰ প্ৰাক্তন মুখ্যমন্ত্ৰী সৰ্বানন্দ সোণোৱালে বাঘজানলৈ আহি বাঘজান অঞ্চলৰ উন্নয়নৰ ক্ষেত্ৰত কেইবাটাও প্ৰতিশ্ৰুতি প্ৰদান কৰিছিল । কিন্তু সেই প্ৰতিশ্ৰুতি কেৱল প্ৰতিশ্ৰুতিয়ে হৈ ৰ’ল বুলি অভিযোগ উত্থাপন কৰিছে বাঘজানবাসীয়ে ।
উল্লেখ্য যে, বিগত ২৫ ছেপ্তেম্বৰৰ নিশা প্ৰায় ৮ মান বজাত অইল ইণ্ডিয়াৰ বাঘজান টি বি কে খাদত সংঘটিত হৈছিল এক অঘটন ৷ জানিব পৰা মতে, উক্ত দিনা বাঘজান টি বি কে খাদত কৰ্মৰত এজন সুৰক্ষা কৰ্মীয়ে বাঘজানৰ আন এজন যুৱক কৰ্মচাৰীৰ মূৰত গুৰুতৰভাৱে আঘাত কৰিছিল ৷