Tea workers protest:সদৌ অসম ক্ষুদ্ৰ চাহ খেতিয়ক সন্থাৰ উদ্যোগত বিশাল গণ গৰ্জন কাৰ্যসূচী

ডুমডুমাত সদৌ অসম ক্ষুদ্ৰ চাহ খেতিয়ক সন্থাৰ উদ্যোগত বিশাল গণ গৰ্জন কাৰ্যসূচী । ক্ষুদ্ৰ চাহ খেতিয়কে উৎপাদন কৰা কেঁচা চাহপাতৰ উচিত মূল্য প্ৰদানৰ দাবী ।

তিনিচুকীয়া, ৮ ছেপ্টেম্বৰ :সমস্যাৰ অন্ত নাই ক্ষুদ্ৰ চাহ খেতিয়কসকলৰ ৷ উচিত মূল্য বিচাৰি সময়ে সময়ে তেওঁলোকে প্ৰতিবাদ সাব্যস্ত কৰি আহিছে যদিও কোনো কাণসাৰ নাই চৰকাৰী কৰ্তৃপক্ষৰ ৷শুকুৰবাৰে তিনিচুকীয়া জিলাৰ চাহ নগৰী ডুমডুমা নগৰৰ ৰাজহুৱা খেলপথাৰত পুনৰ প্ৰতিবাদত বহিল সদৌ অসম ক্ষুদ্ৰ চাহ খেতিয়ক সন্থা ৷ সদৌ অসম ক্ষুদ্ৰ চাহ খেতিয়ক সন্থাৰ উদ্যোগত তিনিচুকীয়া জিলাৰ চাহ নগৰী ডুমডুমা নগৰৰ ৰাজহুৱা খেলপথাৰত এক বিশাল প্ৰতিবাদী কাৰ্যসূচী গ্ৰহণ কৰা হয় । তিনিচুকীয়া জিলাখনৰ বিভিন্ন প্ৰান্তৰ পৰা অহা শ-শ ক্ষুদ্ৰ চাহ খেতিয়ক সকলৰ উপস্থিতিত আয়োজন কৰা এই কাৰ্যসূচীত ক্ষুদ্ৰ চাহ খেতিয়ক সকলে উৎপাদন কৰা কেঁচা চাহপাতৰ উচিত মূল্য প্ৰদানৰ দাবী জনায় ।

ক্ষুদ্ৰ চাহ খেতিয়কসকলে কেঁচা চাহপাত উৎপাদন কৰিবলৈ প্ৰয়োজন হোৱা খৰচতকৈ কম মূল্য এই সকল ক্ষুদ্ৰ চাহ খেতিয়কে লাভ কৰি আহিছে । যাৰ বাবে ক্ষুদ্ৰ চাহ খেতিয়ক সকলৰ ভৱিষ্যত তীব্ৰ সংকটৰ দিশে গতি কৰিছে । ইফালে, একাংশ বহিৰাগত বণিয়াৰ হাতত থকা ফেক্টৰী সমূহে প্ৰতি কিলোগ্ৰাম কেঁচা চাহপাতৰ মূল্য ক্ষুদ্ৰ চাহ খেতিয়ক সকলক ১২-১৩ টকাহে প্ৰদান কৰি আহিছে ।

অন্যহাতে, অৰুণাচল প্ৰদেশৰ পৰা বৰ্তমান সময়ত অবাধ হাৰত অবৈধ কেঁচা চাহপাত তিনিচুকীয়া জিলাখনত প্ৰৱেশ কৰাৰ ফলতো অসমৰ ক্ষুদ্ৰ চাহ খেতিয়ক সকলে কেঁচা চাহপাতৰ উচিত মূল্য লাভৰ পৰা বঞ্চিত হৈ আহিছে । চৰকাৰে ক্ষুদ্ৰ চাহ খেতিয়ক সকলৰ এই সমস্যা সমূহ সমাধানৰ ক্ষেত্ৰত যদিহে সময়পযোগী কোনো ব্যৱস্থা গ্ৰহণ নকৰে তেন্তে পৰৱৰ্তী সময়ত তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰিছে ক্ষুদ্ৰ চাহ খেতিয়কসকলে।

লগতে পঢ়ক :Protest in Tinsukia: কেঁচা চাহপাতৰ উচিত মূল্য প্ৰদানৰ দাবীত সদৌ অসম ক্ষুদ্ৰ চাহ খেতিয়ক সন্থাৰ প্ৰতিবাদ