ডুমডুমা, ২৮ ফেব্ৰুৱাৰী : ডুমডুমাৰ সমীপৰ তালাপত দেওবাৰে অসম জাতীয় পৰিষদৰ ভাতৃ সংগঠন জাতীয় চাহ শক্তিৰ সাংগঠনিক আৰু যোগদান কাৰ্যসূচী অনুষ্ঠিত হয় । অনুষ্ঠানত অসম জাতীয় পৰিষদৰ সম্পাদক জগদীশ ভূঞা উপস্থিতিতি বহুসংখ্যক লোকে আজি অসম জাতীয় পৰিষদত আনুষ্ঠানিকভাৱে যোগদান কৰে । শদিয়া বিধানসভা সমষ্টিৰ অন্তৰ্গত তালাপত অনুষ্ঠিত হোৱা জাতীয় চাহ শক্তিৰ যোগদান কাৰ্যসূচীত আদিবাসী জনগোষ্ঠীৰ কেইবাজনো বিশিষ্ট ব্যক্তিয়েও দলটোত যোগদান কৰে ।
যোগদান সভাত বক্তব্য ৰাখি চাহ বাগিছাৰ জনসাধাৰণক পূৰ্বতে কংগ্ৰেছে ভোট বেংক হিচাপে ব্যৱহাৰ কৰিছিল আৰু বৰ্তমান বিজেপিয়ে তেওঁলোকক ভোটবেংক হিচাপে ব্যৱহাৰ কৰা বুলি উল্লেখ কৰে জগদীশ ভূঞাই । তেওঁ চাহ জনগোষ্ঠীৰ জণসাধাৰণৰ সৰ্বাংগীন বিকাশ আৰু উন্নতি হ’লেহে অসমৰ সৰ্বাংগীন বিকাশ আৰু উন্নতি সম্ভৱ বুলি মন্তব্য কৰে । চাহ জনগোষ্ঠী-আদিবাসী সমাজ অসমীয়া জাতিসত্বাৰ এক অবিছেদ্য অংগ আৰু এই জনগোষ্ঠীৰ বিকাশ অবিহনে অসমীয়া জাতিসত্বাৰ বিকাশ হ’ব নোৱাৰে বুলি উল্লেখ কৰে অসম জাতীয় পৰিষদৰ সম্পাদক জগদীশ ভূঞাই । যোগদান কাৰ্যসূচীত অতি কম দিনৰ ভিতৰতেই অসম জাতীয় পৰিষদৰ প্ৰাৰ্থী তালিকা ঘোষণা কৰা হ'ব বুলি ভূঞাই সাংবাদিকৰ আগত মন্তব্য কৰে ।
