ক'লা পতাকাক কেৰেপ নকৰে বিধায়ক বিনোদ হাজৰিকাই

ৰাজ্যৰ ভিন্ন প্ৰান্ত অব্যাহত আছে নাগৰিকত্ব সংশোধনী আইন বিৰোধী প্ৰতিবাদ ৷ আইনখনৰ বাতিলৰ দাবীতে শুকুৰবাৰে ভিন্ন প্ৰান্তত আছুৱে ক'লা পতাকা প্ৰদৰ্শন কৰে কেইবাগৰাকীও বিধায়ক মন্ত্ৰীক ৷

তিনিচুকীয়া, 10 জানুৱাৰীঃ তিনিচুকীয়া গেলাপুখুৰীত আছুৱে ক'লা পতাকা দেখুৱালে চাবুৱা সমষ্টিৰ বিধায়ক বিনোদ হাজৰিকাক । বিধায়ক গৰাকীয়ে তিনিচুকীয়া গেলাপুখুৰী এজন বিজেপি কৰ্মী আৰু বৰগুৰি গাঁও পঞ্চায়তৰ সভাপতি ধৰ্মকান্ত বৰপাত্ৰ গোহাঁই ঘৰলৈ গৈ থকা সময়তে ক'লা পতাকা প্ৰদৰ্শন কৰে৷ প্ৰতিবাদৰ সময়ত ঘৰৰ ভিতৰতে সোমাই থাকিল বিজেপি বিধায়ক বিনোদ হাজৰিকা ।

আনহাতে, ক'লা পতাকা প্ৰদৰ্শন কৰা আছুৰ তিনিচুকীয়া জিলা সভাপতি সম্পাদক সহ প্ৰতিবাদকাৰীক আটক কৰে তিনিচুকীয়া আৰক্ষীয়ে ।

উল্লেখ্য যে, নাগৰিকত্ব সংশোধনী আইন বিৰোধী আন্দোলনৰ সময়ত বিজেপি দখলত থকা বৰগুৰি পঞ্চায়ৰ সভাপতি ধৰ্মাকান্ত বৰপাত্ৰ গোঁহাই সহ পঞ্চায়তৰ আটাইকেইগৰাকী সদস্য‌ই জিলা আছুৰ সন্মুখত পদত্যাগ কৰিছিল । কিন্তু পদত্যাগৰ পাচতো শুকুৰবাৰে পঞ্চায়ৰ সভাপতিৰ বাসগৃহত বিধায়ক গৰাকী উপস্থিত হোৱা কাৰ্যই আচম্বিত কৰিছে নাগৰিকত্ব সংশোধনী আইন বিৰোধী প্ৰতিবাদকাৰীক ৷

ইফালে ক'লা পতাকা দেখুৱাৰ পিছতে বিধায়ক বিনোদ হাজৰিকাৰ প্ৰতিক্ৰিয়া, "প্ৰতিবাদকাৰি সকলে ঘৰ জ্বলাব অহাৰ বাবেই ধৰ্মকান্ত বৰপাত্ৰ গোঁহাইক পদত্যাগক কৰিবলৈ কৈছিলো৷ সিহঁতে ক'লা পতাকা লৈ ঘূৰিছে আমি বগা পতাকা লৈ ঘূৰিছো ৷ এজনো যদি বাংলাদেশীক সংস্থাপন দিয়ে তেন্তে চাবুৱাত বিজেপি নাথাকিব" বুলি মন্তব্য আগবঢ়াই বিধায়ক গৰাকীয়ে ৷

ডিব্ৰুগড়, 10 জানুৱাৰীঃ ডিব্ৰুগড়ত ক'লা পতাকাৰ সন্মুখীন হয় কেন্দ্ৰীয় মন্ত্ৰী ৰামেশ্বৰ তেলী আৰু বিধায়ক প্ৰশান্ত ফুকন ৷ ডিব্ৰুগড়ত বিজেপিয়ে শান্তি সভা অনুষ্ঠিত কৰাৰ বাবে আৱৰ্ত ভৱনত বৈঠকত বহাৰ সময়তে আছুৱে ক'লা পতাকা লৈ প্ৰতিবাদ কৰে ।

উল্লেখ্য যে, ডিব্ৰুগড়ৰ খনিকৰত বিজেপিয়ে আগন্তুক ১৯ জানুৱাৰীত শান্তি সভা অনুষ্ঠিত কৰাৰ বাবে ভিতৰুৱাকৈ প্ৰস্তুতি চলাইছে । ডিব্ৰুগড়ৰ আৱৰ্ত ভৱনত এই উপলক্ষে মিলিত হোৱাৰ সময়তে আছুৰ নেতৃবৰ্গই ক'লা পতাকা প্ৰদৰ্শন কৰি বৰ তাল বজাই বিভিন্ন শ্ল'গানেৰে পৰিৱেশ উত্তাল কৰি তোলে ।

ৰঙিয়া, 10 জানুৱাৰীঃ ৰঙিয়াত ভুৱনেশ্বৰ কলিতাক ক'লা পতাকাদেখুৱালে আছুৱে । ৰঙিয়া থানাৰ সমীপত কটকটীয়া নিৰাপত্তা বেষ্টনীৰ মাজত আছুৱে ক'লা পতাকা দেখুৱালে ভুৱনেশ্বৰ কলিতাক । ৰঙিয়া ৰাইজমেল কৃষক ভৱনত অনুস্থিত বছৰেকীয়া অনুষ্ঠানত অংশ ল'বলৈ আহিছিল ভূৱনেশ্বৰ কলিতা । সেই স্থানতে নাগৰিকত্ব সংশোধনী আইন বিৰুদ্ধে অৱস্থান ধৰ্মঘট কাৰ্যসূচী গ্ৰহণ কৰিছিল আছুৱে ৷ অনুস্থান সামৰি ভূৱনেশ্বৰ কলিতা গাড়ীত উঠিব লোৱা সময়তে ক'লা পতাকা প্ৰদৰ্শন কৰে আছুয়ে ।

আৰু পঢ়কঃ বানে ধোৱা লখিমপুৰত বিকল্প কৃষিৰে স্বাৱলম্বী কৃষক