তিনিচুকীয়া, 1 আগষ্ট : ৰাজ্যত অব্যাহত থকা ক'ভিড পৰিস্থিতিৰ মাজতে দেওবাৰে তিনিচুকীয়া জিলাৰ মাকুমস্থিত দ্বিতীয় অসম আৰক্ষী বাহিনীৰ 69 সংখ্যক প্ৰতিষ্ঠা দিৱস বাহিনীৰ মুখ্য কাৰ্যালয়ত পালন কৰা হয় ৷ ক'ভিড মহামাৰীৰ প্ৰতি লক্ষ্য ৰাখি তথা স্বাস্থ্যসন্মত নীতি-নিয়ম মানি এই প্ৰতিষ্ঠা দিৱস পালন কৰা হয় ৷ মূল কাৰ্যসূচী আৰম্ভ হোৱাৰ পূৰ্বে চৌহদত থকা শ্বহীদ বেদীত যিসকল বীৰ জোৱানে দেশৰ বাবে আত্ম বলিদান দিলে, সেইসকলৰ পবিত্ৰ স্মৃতিত বিষয়া-কৰ্মচাৰীসকলে শ্ৰদ্ধাঞ্জলি নিবেদন কৰে ৷ প্ৰতিষ্ঠা দিৱস উপলক্ষে পুৱা অসম আৰক্ষীৰ পতাকা উত্তোলন কৰে বাহিনীৰ অধিনায়ক ড৹ নন্দ সিং বৰকলাই ৷
ইয়াৰ পাছতে অধিনায়কগৰাকীয়ে আৰক্ষী লোকসকলৰ কুচকাৱাজ আৰু অভিবাদন গ্ৰহণ কৰে ৷ পতাকা উত্তোলন কৰি দিয়া ভাষণত অধিনায়কগৰাকীয়ে অসম আৰক্ষীৰ সুদিন আৰু দুৰ্দিনৰ ব্যাখ্যা দাঙি ধৰি অসম আৰক্ষীৰ বলিদানৰ বিষয়ে শ্ৰদ্ধাৰে স্মৰণ কৰে ৷ ভাষণ প্ৰসংগত অধিনায়কগৰাকীয়ে বাহিনীৰ লোক সকলক কৰ্তব্য পালন, নিয়মানুৱৰ্তিতা আৰু অসম তথা ভাৰতৰ বিপদকালত যেতিয়াই যি নিৰ্দেশ আহে, তাক দক্ষতাৰে পালন কৰিবলৈ আহ্বান জনায় ৷ লগতে প্ৰতিষ্ঠা দিৱসৰ লগত সংগতি ৰাখি মূল তোৰণৰ কাষত নিৰ্মাণ কৰি উলিওৱা নিৰাপত্তা গৃহ এটিও মুকলি কৰে বাহিনীৰ অধিনায়ক বৰকলাই ৷