খাকীত হাত দিয়াৰ মৰসাহ উদণ্ড যুৱকৰ

তিনিচুকীয়াৰ বাইপাছৰ দিহিঙীয়া চাৰিআলিত সোমবাৰে মাস্ক পৰিধান নকৰাৰ বাবে আৰক্ষীৰ কনিষ্টবল এজনক প্ৰহাৰ (Attack On Police) কৰে 5 যুৱকে ৷ হোটেলত অকলে কিবা খাই থকা সময়তে কনিষ্টবলগৰাকীক মাৰপিট কৰে যুৱককেইজনে ৷ ঘটনা সন্দৰ্ভত ইতিমধ্যে তিনিজনক আটক কৰা হৈছে ৷ বাকী দুজনক শীঘ্ৰে আটক কৰিব বুলি সদৰী কৰে পানীতোলা আৰক্ষী চকীৰ ভাৰপ্ৰাপ্ত আৰক্ষী বিষয়াই ৷

তিনিচুকীয়া, 13 জুলাই :যি সময়ত ৰাজ্যত আৰক্ষীয়ে সচেতন লোকক মাৰপিট কৰাৰ অভিযোগ উত্থাপন হৈ আহিছে, তেনে সময়তে আৰক্ষীক প্ৰহাৰ (Attack On Police) কৰা ঘটনাই সৃষ্টি কৰিছে তীব্ৰ চাঞ্চল্যৰ ৷ এই দৃশ্য সংঘটিত হৈছে তিনিচুকীয়া জিলাৰ বাইপাছৰ দিহিঙীয়া চাৰিআলিত ৷ সোমবাৰে কিৰণ গোহাঁই, কৌশিক গোহাঁই, ভৱেশ গোহাঁই, সৌৰৱ দত্ত আৰু ভাস্কৰ গোহাঁই নামৰ পাঁচজনীয়া এটি যুৱকৰ দলে মাৰপিট কৰে এগৰাকী আৰক্ষীৰ কনিষ্টবলক ৷ মাস্ক নিপিন্ধাৰ বাবেই কনিষ্টবলগৰাকীক প্ৰহাৰ কৰা বুলি এজন অভিযুক্তই সাংবাদিকৰ আগত সদৰী কৰে ৷

প্ৰাপ্ত তথ্য অনুসৰি, দিহিঙীয়া চাৰিআলি বাইপাছস্থিত এখন সৰু হোটেলত খাদ্য গ্ৰহণ কৰি থকাৰ সময়তে যুৱকৰ দলটোৱে মাৰপিট কৰি অশ্লীল ভাষাৰে গালি-গালাজ কৰে কনিষ্টবল ময়ুৰ ৰঞ্জন দাস (Mayur Ranjan Das)ক । ঘটনা সন্দৰ্ভত তিনিচুকীয়া আৰক্ষীক অৱগত কৰে কনিষ্টবল দাসে ৷ ইয়াৰ পাচতে পানীতোলা আৰক্ষী চকীৰ ভাৰপ্ৰাপ্ত বিষয়া দীনকান্ত সোণোৱাল (Dinkanta Sonowal)ৰ নেতৃত্বত যোৱা এটি আৰক্ষীৰ দলে নিশাৰ ভাগতে তিনিজন অভিযুক্তক আটক কৰে ৷

বাকী দুজন অভিযুক্তক নিশা কৰায়ত্ব কৰিবলৈ সক্ষম নহ’ল আৰক্ষী ৷ দুয়োজনৰে সন্ধানত তদন্ত অব্যাহত ৰাখিছে পানীতোলা আৰক্ষীয়ে ৷ এই কথা সদৰী কৰে পানীতোলা আৰক্ষী চকীৰ ভাৰপ্ৰাপ্ত বিষয়া দীনকান্ত সোণোৱালে ৷

অভিযুক্ত যুৱককেইজনৰ ঘৰ লাইপুলিৰ পানীতোলাত ৷ আনহাতে, আৰক্ষী কনিষ্টবল ময়ুৰ ৰঞ্জন দাস ছেকেণ্ড বেটালিয়নৰ মাকুম হেড কোৱাৰ্টাৰত কৰ্মৰত । আটকাধীন যুৱক তিনিজনক আৰক্ষীয়ে নিজৰ জিম্মাত ৰাখি সোধ-পোচ অব্যাহত ৰাখিছে ৷ ঘটনা সন্দৰ্ভত ভাৰতীয় দণ্ডবিধি আইন (IPC)ৰ ধাৰা অনুসৰি যুৱক কেইজনক উচিত শাস্তি প্ৰদান কৰিবলৈ আৰক্ষীক দাবী জনাইছে সচেতন মহলে ৷

লগতে পঢ়ক :ভিডিঅ' ভাইৰেল কৰা যুৱকৰ বিৰুদ্ধে গোচৰ ৰুজু