তিনিচুকীয়া, 28 মে’: তিনিচুকীয়াৰ সংবাদকৰ্মীসকলৰ মূল সংগঠন তিনিচুকীয়া সাংবাদিক চ’ৰাৰ আজি পুৱাৰ পৰা দিনযোৰা কাৰ্যসূচীৰে তিনিচুকীয়া চহৰত অৱস্থিত নিজা কাৰ্যালয়ত দশম সংখ্যক অধিৱেশন অনুষ্ঠিত হয় ৷ প্ৰথমে তিনিচুকীয়া সাংবাদিক চ’ৰাৰ সম্পাদক প্ৰণৱ ফুকনে আঁত ধৰা অনুষ্ঠানত পতাকা উত্তোলন কৰে সভাপতি কমল তালুকদাৰে আৰু শ্বহীদ তৰ্পণ কৰে জ্যেষ্ঠ সাংবাদিক অমূল্য খাটনিয়াৰে ৷ দ্বিতীয় কাৰ্যসূচী হিচাবে জ্যেষ্ঠ সাংবাদিক তথা তিনিচুকীয়া মহাবিদ্যালয়ৰ অৱসৰপ্ৰাপ্ত অধ্যক্ষ ড৹ ঋষি দাস আৰু জ্যেষ্ঠ সাংবাদিক অমূল্য খাটনিয়াৰে সাংবাদিকসকলক উদ্দেশ্যি সংবাদ পৰিবেশনৰ লগতে দায়বদ্ধতাৰ উপৰত কিছু আলোকপাত কৰে (10th Conference of Tinsukia Press Club) ৷
ইয়াৰ পাচতেই তিনিচুকীয়াৰ দুগৰাকী সংবাদকৰ্মীৰ সন্তানে শিক্ষাৰ ক্ষেত্ৰত সফলতা অৰ্জন কৰাৰ বাবে দুই সুযোগ্য সন্তানক সম্বৰ্ধনা জ্ঞাপন কৰা হয় ৷ ইয়াৰ পাচতে দুপৰীয়াৰ আহাৰ গ্ৰহণ কৰাৰ অন্তত সভাপতি কমল তালুকদাৰৰ সভাপতিত্বত অন্তিমখনি চ’ৰাৰ সাধাৰণ সভা অনুষ্ঠিত হয় ৷ সভাখনিৰ আঁত ধৰে তিনিচুকীয়া সাংবাদিক চ’ৰাৰ সম্পাদক প্ৰণৱ ফুকনে ৷ সাধাৰণ সভাখনত বিগত কাৰ্যকালৰ সম্পাদকীয় প্ৰতিবেদন সম্পাদক প্ৰণৱ ফুকন আৰু বিত্তীয় প্ৰতিবেদন বিত্ত সম্পাদক উমেশ সিঙে পাঠ কৰে (Tinsukia Press Club) ৷