ধুবুৰী, 5 ফেব্ৰুৱাৰী : অসমৰ মানচিত্ৰৰ পৰা দিনক দিনে নিশ্চিহ্ন হৈ গৈ আছে দক্ষিণ শালমাৰা সমষ্টি । ইখনৰ পিচত সিখন গাঁও বিলীন হৈছে লুইতৰ গৰ্ভত । অব্যাহত আছে ফকিৰগঞ্জ অঞ্চলৰ গলাদিগি গাঁৱত ব্ৰহ্মপুত্ৰৰ ভয়ংকৰ গৰাখহনীয়া ।
স্থানীয় ৰাইজ আৰু আছু নেতাৰ মন্তব্য প্ৰতি বছৰে সমষ্টিটোৰ ইখনৰ পিচত সিখনকৈ গাঁও ব্ৰহ্মপুত্ৰৰ বুকুত বিলীন হোৱাৰ পিচত সম্প্ৰতি খৰালি দিনতো ব্ৰহ্মপুত্ৰই তাণ্ডৱ সৃষ্টি কৰিছে ফকিৰগঞ্জৰ গলাদিগি গাঁৱত । গলাদিগি প্ৰথম খণ্ড গাঁও ইতিমধ্যে ব্ৰহ্মপুত্ৰই গ্ৰাস কৰাৰ পিচত গলাদিগি দ্বিতীয় খণ্ড গাঁও সম্পূৰ্ণৰূপে নিশ্চিহ্ন হোৱাৰ পথত ।
ইফালে, ব্ৰহ্মপুত্ৰৰ কালৰূপী গৰাখহনীয়াৰ স্থায়ী প্ৰতিৰোধৰ বাবে স্থানীয় ৰাইজ আৰু আছুৱে বিভিন্ন সময়ত দাবী জনাই আহিছিল যদিও স্থানীয় বিধায়ক ৱাজেদ আলী চৌধুৰী, সাংসদ বদৰুদ্দিন আজমলে গুৰুত্ব প্ৰদান নকৰাৰ অভিযোগ উত্থাপন হৈছে ৷
আনহাতে, শুকুৰবাৰে দক্ষিণ শালমাৰা মানকাচৰ জিলা আছুৰ সাধাৰণ সম্পাদক শ্বৰিফুল ইছলাম প্ৰধানীয়ে খহনিয়া অঞ্চলত উপস্থিত হৈ শীঘ্ৰে স্থানীয় বিধায়ক তথা সাংসদ গৰাকীক ব্ৰহ্মপুত্ৰ গৰাখহনীয়াৰ বিজ্ঞানসন্মতভাৱে স্থায়ী প্ৰতিৰোধ কৰিবলৈ আহ্বান জনাইছে ৷ অন্যথা সৰ্ব সাধাৰণ ৰাইজক লৈ আছুৱে তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰিছে ৷
লগত পঢ়ক :ঊষাৰাণী চেলেঙলৈ অসম লেখিকা সন্থাৰ লাৱণ্য হাজৰিকা আদৰ্শ মাতৃ বঁটা
