কাজিৰঙা ৰাষ্ট্ৰীয় উদ্যানত মুকলি বনৰজা

বানৰ কবলত দিশহাৰা হৈ কাজিৰঙা ৰাষ্ট্ৰীয় উদ্যানৰ ব্যাঘ্র প্ৰকল্পৰ এজনী বাঘিনীয়ে আশ্ৰয় লৈছিল এঘৰ মানুহৰ ঘৰত ৷ বন বিভাগে ট্ৰেংকুলাইজ কৰি উদ্ধাৰ কৰা বাঘিনীজনী পুনৰ শুকুৰবাৰে মুকলি কৰি দিয়ে উদ্যানখনত ৷

তেজপুৰ,17 জুলাই: বিগত 15 জুলাইত কাজিৰঙা ৰাষ্ট্ৰীয় উদ্য়ানৰ পৰা ওলাই অহা এজনী বাঘিনীয়ে আশ্ৰয় লৈছিল উদ্যানখনৰ সমীপৰ এঘৰত ৷ বানৰ কবলৰ পৰা ৰক্ষা পাবলৈ উদ্যানখনৰ বন্যপ্ৰাণীসমূহ সম্প্ৰতি যেনি তেনি ওলাই অহা দেখা গৈছে ৷ উক্ত বাঘিনীজনীক বন বিভাগৰ তৎপৰতাত ট্ৰেংকুলাইজ কৰি আবদ্ধ কৰা হৈছিল পিঞ্জৰাত ৷ বন বিভাগে যাৱতীয় চিকিৎসাৰ অন্তত পুনৰ বাঘিনীজনীক শুকুৰবাৰে মুকলি কৰি দিয়ে উদ্যানখনত ৷

কাজিৰঙা ৰাষ্ট্ৰীয় উদ্যানৰ সঞ্চালক পি শিৱ কুমাৰে এই প্ৰসংগত জনাই যে,বন বিভাগৰ লোকে উদ্যানখনৰ পাণবাৰীস্থিত সুৰক্ষা কেন্দ্ৰত চিকিৎসা প্ৰদান কৰি বাঘিনীজনী সুস্থ হোৱাৰ পিছত পুনৰ মুকলি কৰাৰ সিদ্ধান্ত গ্ৰহণ কৰে ৷ দুবছৰীয়া বাঘিনীজনীক বন বিভাগৰ লোকে চিকিৎসকৰ উপস্থিতিত উদ্যানৰ ভিতৰত মুকলি কৰে ৷

লগতে চাওকঃশোণিতপুৰত 504 গৰাকীলৈ বৃদ্ধি কৰ’ণা আক্ৰান্তৰ সংখ্যা