তেজপুৰ, 22 জানুৱাৰী: ক্লাছলৈ বুলি ওলাই গৈ নিৰুদ্দেশ হৈছিল তেজপুৰৰ দৰং মহাবিদ্যালয়ৰ একাদশ শ্ৰেণীৰ ছাত্ৰী পৰিস্মীতা দেৱী (Darrang college girl missing case) ৷ ছাত্ৰীগৰাকী নিৰূদ্দেশ হোৱাৰ পিছতে এই ঘটনা অপহৰণ বুলি ধাৰণা কৰা হৈছিল ৷ আৰক্ষীৰ অনুসন্ধানৰ পিছতে এই ঘটনাই লৈছে নতুন মোৰ ।
শুকুৰবাৰে নিৰুদ্দিষ্ট ছাত্ৰীগৰাকীক নলবাৰীত উদ্ধাৰ কৰে আৰক্ষীয়ে । তেজপুৰ সদৰ আৰক্ষীয়ে ছাত্ৰীগৰকীক সোধপোচ কৰাত মুন ডেকাৰ নামৰ প্ৰেমিকৰ লগত নলবাৰীলৈ যোৱা বুলি স্বীকাৰ কৰাৰ লগতে এয়া অপহৰণৰ নাছিল বুলি কয় পৰিস্মীতা দেৱীয়ে ।
ছাত্ৰীগৰাকী নিৰুদ্দেশ হোৱাৰ পিছত জীয়ৰীৰ মুক্তিপণ হিচাপে পাঁচ লাখ টকা দাবী কৰা বুলি মিছা মাতিছিল পৰিস্মীতাৰ মাতৃয়ে । এই কথাও তেজপুৰ আৰক্ষীৰ সন্মুখত কয় পৰিস্মীতাই । আনহাতে মুন ডেকা নামৰ যুৱকজনক বৰ্তমানেও আটক কৰিবলৈ সক্ষম হোৱা নাই আৰক্ষীয়ে ।
উল্লেখযোগ্য যে, যোৱা ২০ জানুৱাৰীত তেজপুৰ দৰং মহাবিদ্যালয়ৰ বাণিজ্য শাখাৰ একাদশ শ্ৰেণীৰ ছাত্ৰী পৰিস্মীতা দেৱীক অপহৰণৰ অভিযোগ তুলিছিল পিতৃ-মাতৃয়ে । উক্ত দিনা বিয়লি একমান বজাত মাতৃ মৃদুলা দেৱীৰ লগত শেষবাৰৰ বাবে কথা পতাৰ সময়ত পৰিস্মীতাই ক্লাছ শেষ হৈছে আৰু ঘৰলৈ গৈ আছো বুলি কয় । কিন্তু ডেৰমান বজাত পৰিস্মীতাৰ মবাইলৰ পৰা এজন যুৱকে তেওঁলোকৰ কন্যাক অপহৰণ কৰা বুলি কৈ মুক্তিপণ হিচাপে পাঁচ লাখ টকা দাবী কৰা বুলি পৰিস্মীতাৰ মাতৃ মৃদুলাই দেৱীয়ে সাংবাদিকৰ আগত ব্যক্ত কৰিছিল ।