তেজপুৰ,২২ চেপ্তেম্বৰ :তেজপুৰ চলাগাঁৱত উলংগ অৱস্থাত উদ্ধাৰ কিশোৰীৰ মৃতদেহ ৷ কিশোৰী গৰাকীক ধৰ্ষণ কৰি হত্যা কৰাৰ সন্দেহ আৰক্ষীৰ ৷ ঘটনাক কেন্দ্ৰ কৰি অঞ্চলজুৰি চাঞ্চল্য সৃষ্টি হৈছে ৷
বিবস্ত্ৰ অৱস্থাত চলাগাঁৱৰ এখন নিৰ্জন ফিল্ডত উদ্ধাৰ হয় গৰৈমাৰী বঢ়িগিৰী আহোম গাঁৱৰ প্ৰায় ১৬/১৭ বছৰীয়া এগৰাকী কিশোৰীৰ মৃতদেহ ৷ ফিল্ডত সুৰাৰ বটল উদ্ধাৰ হোৱাৰ বাবেই দলবদ্ধভাৱে কিশোৰী গৰাকীক ধৰ্ষণ কৰি হত্যা কৰাৰ সন্দেহ প্ৰকাশ কৰিছে আৰক্ষী তথা স্থানীয় ৰাইজে ৷
তেজপুৰত উলংগ অৱস্থাত উদ্ধাৰ কিশোৰীৰ মৃতদেহ উল্লেখ্য যে, শনিবাৰে সন্ধিয়া ঘৰৰ পৰা ওলাই গৈছিল কিশোৰী গৰাকী ৷ সন্ধিয়া 5 বজালৈকে পৰিয়ালৰ লগত ফোনযোগে যোগাযোগ হৈছিল কিশোৰী গৰাকীৰ ৷ আনহাতে, একাধিক যুৱকৰ লগত প্ৰেমৰ সম্পৰ্ক আছিল বুলি আৰক্ষীক অবগত কৰে পৰিয়ালৰ লোকে ৷ অপৈণত প্ৰেমৰ কৰুণ পৰিণতি বাবেই হত্যাকাণ্ড সংঘটিত হোৱাৰ সন্দেহ প্ৰকাশ কৰিছে স্থানীয় ৰাইজে ৷
আনহাতে, ঘটনাস্থলীত উচ্চপদস্থ আৰক্ষী বিষয়াৰ দল উপস্থিত হৈ তদন্ত কৰি সোধপোছৰ বাবে আটক কৰিছে দুজনক ৷ তাৰোপৰি মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে বুলি জানিবলৈ দিয়ে আৰক্ষীয়ে ৷
