তেজপুৰ, ২২ জুন : তেজপুৰ বিশ্ববিদ্যালয়ত পুনৰ অঘটন । হোষ্টেলৰ নিজৰ কোঠাত শুই থকা অৱস্থাতে অতি ৰহস্যজনক অৱস্থাত উদ্ধাৰ কৰা হয় এজন ছাত্ৰৰ মৃতদেহ ৷ মৃত ছাত্ৰজনৰ ঘৰ তিনিচুকীয়া জিলাত ৷ জানিব পৰা মতে, মৃত ছাত্ৰজন আছিল পৰিৱেশ বিজ্ঞানৰ চূড়ান্ত বৰ্ষৰ ছাত্ৰ ৷ ঘটনাৰ সন্দৰ্ভত জানিব পাৰি বুধবাৰে নিশাই তেজপুৰত উপস্থিত হৈছেগৈ নিহত ছাত্ৰজনৰ পিতৃ ৷
তেজপুৰ বিশ্ববিদ্যালয় তৰফৰ পৰা জনোৱা মতে, ইতিমধ্যে ছাত্ৰজনৰ মৃতদেহ তেজপুৰ কনকলতা অসামৰিক চিকিৎসালয়লৈ প্ৰেৰণ কৰিছে আৰক্ষীয়ে । এয়া হত্যা নে আত্মহত্যা সেই সন্দৰ্ভত জানিব পৰা নাই কোনো তথ্য ৷ ছাত্ৰজনৰ স্বাস্থ্যজনিত কাৰণত নিশা কোনো অসুবিধাৰ সন্মুখীন হৈ মৃত্যু হোৱাৰ সন্দেহ কৰিছে বিশ্ববিদ্যালয় কৰ্তৃপক্ষই ৷ অৱশ্যে ছাত্ৰজনৰ মৃত্যু স্বাভাৱিক নে এইয়া আত্মহত্যা নে আন কোনো ৰহস্যজনক কাৰণত মৃত্যু হৈছে সেয়া মৰণোত্তৰ পৰীক্ষাৰ প্ৰতিবেদন অহাৰ পিচতহে জানিব পৰা যাব ।
কিন্তু শেহতীয়াকৈ মৃত ছাত্ৰগৰাকীৰ দেউতাকে কেতবোৰ বিস্ফোৰক মন্তব্য দিছে ৷ পিতৃৰ ভাষ্য অনুসৰি তেওঁৰ পুত্ৰই আত্মহত্যা কৰা নাই, বৰঞ্চ তেওঁক হত্যা কৰা হৈছে ৷ পুত্ৰৰ আকস্মিক মৃত্যুত ম্ৰিয়মান পিতৃয়ে এতিয়া CBI তদন্তৰ বাবে দাবী উত্থাপন কৰিছে ৷ তেজপুৰ কনকলতা অসামৰিক চিকিৎসালয়ত পিতৃয়ে আগবঢ়াইছে এইসমূহ মন্তব্য ৷