তেজপুৰ, ৮ ছেপ্টেম্বৰ :সুধাকণ্ঠ ভূপেন হাজৰিকাৰ জন্মদিন আজি ৰাজ্যজুৰি উদযাপন কৰা হৈছে ৷ ওপজা দিনৰ লগত সংগতি ৰাখি বিভিন্ন ঠাইত বিভিন্ন অনুষ্ঠানৰ আয়োজন কৰা হৈছে ৷ আজিৰ এই বিশেষ দিনটোত আমি আপোনালোকলৈ আগবঢ়াইছো এক বিশেষ প্ৰতিবেদন, য’ত আপোনালোকে জানিবলৈ পাব ভূপেন হাজৰিকাই গান কেতিয়া কেনেদৰে লিখিছিল, কেনেদৰে শুইছিল, ক’ত বজাৰ কৰিছিল, লগত পইচা ৰাখিছিল নে নাই ইত্যাদি বিভিন্ন ধৰণৰ সাধাৰণ মানুহ তথা তেওঁৰ অনুৰাগীয়ে নজনা বহু কথা ৷
সুধাকণ্ঠ ভাৰত ৰত্ন ড৹ ভূপেন হাজৰিকাৰ আজি ৯৭ তম আৰু ৯৮ সংখ্যক জন্ম দিন । সমগ্ৰ ৰাজ্যতে আজি এই গৰাকী মহান শিল্পীক শ্ৰদ্ধাৰে সোঁৱৰণ কৰা হৈছে । সাংস্কৃতিক নগৰী তেজপুৰত চৰকাৰীভাৱে শিল্পী গৰাকীলৈ শ্ৰদ্ধাঞ্জলি জনায় তেজপুৰৰ ৰাইজে । শিল্পী গৰাকীৰ সান্নিধ্য লাভ কৰা তেজপুৰৰ এগৰাকী প্ৰতিষ্ঠিত শিল্পী সংস্কৃতিৰ পূজাৰী মনোজ কুমাৰ নাথ । সৰুৰে পৰাই ড৹ ভূপেন হাজৰিকাৰ সান্নিধ্য লাভ কৰি তেওঁৰ কালজয়ী গীত সমূহ পৰিৱেশন কৰাৰ লগতে নৱ-প্ৰজন্মৰ মাজত এই গীত সমূহ জীয়াই ৰখাৰ চেষ্টা অব্যাহত ৰাখিছে ।
"ভূপেন দা মই আপোনাৰ লগত এবাৰ শুই চাব বিচাৰো..., এইয়া আছিল তেজপুৰ নিবাসী ভূপেন হাজৰিকাৰ ডাঙৰ অনুৰাগী মনোজ নাথৰ তেওঁলৈ অনুৰোধ ৷ বাৰে বাৰে লগ পাইয়ো হেঁপাহ নপলায় যেতিয়া ! শুনক মনোজ নাথৰ মুখুৰেই পুৰণি দিনৰ বহু সুমধুৰ কাহিনী ৷