ৰঙাপৰা, 14 জুলাইঃ ৰাজ্যত অপৰিৱৰ্তিত আছে বান পৰিস্থিতি ৷ সমগ্ৰ ৰাজ্যৰ লগতে শোণিতপুৰ জিলাটো বানে ভয়াৱহ ৰূপ ধাৰণ কৰাৰ লগতে জীয়াভৰালী নৈৰ খহনীয়াত জাহ গৈছে বহু অঞ্চল ৷ বিশেষভাৱে গুৰুত্বপূৰ্ণ 12 মাইলস্থিত সামৰিক ছাউনীৰ প্ৰায় 100 ফুটৰো অধিক মাটি নৈখনে খহাই নিয়াৰ লগতে বিপদ মাতিছে অৰুণাচলৰ টাৱাং সংযোগী বালিপাৰা-টাৱাং পথটোলৈ ৷
12 মাইলত থকা 20আছাম ৰাইফলছৰ ছাউনীটোৰ প্ৰায় বহু অংশ গৰাখহনীয়াত জাহ যোৱাৰ লগতে অৰুণাচলৰ টাৱাং সংযোগী বালিপাৰা-টাৱাং পথলৈ বিপদ মাতি অনাৰ কথা প্ৰকাশ কৰিছে খোদ সামৰিক বিষয়াই ৷
খহনীয়াৰ কৱলত তেজপুৰ সেনা ছাউনী বৰ্তমান শিবিৰত থকা জোৱানসকলক নদীখনৰ পাৰলৈ যোৱাটো নিষিদ্ধ কৰাৰ লগতে সকলো সময়তে সতৰ্ক হৈ থাকিবলৈ নিদেৰ্শ দিয়া হৈছে । বালিপৰা-টাৱাং সংযোগী সংযোগী পথচোৱা খহনীয়া কাষ চাপিবলৈ প্ৰায় ৬০ ফুট মানহে বাকী আছে । নদীখনৰ খহনীয়াই যদি পথচোবাৰ ক্ষতি সাধন কৰে ৰাজ্যখনৰ সৈতে ভালুকপুঙ আৰু চুবুৰীয়া ৰাজ্যখনৰ কেইবাখনো ঠাইৰ সৈতে যোগাযোগ বিছিন্ন হৈ পৰিব ।
এই বিষয়ে শোনিতপুৰ জিলা উপায়ুক্তৰ সৈতে বিগত বৰ্ষতে আলোচনাত মিলিত হৈছিল সামৰিক বিষয়াসকল যদিও বৰ্তমানলৈ কোনো গুৰুত্ব প্ৰদান নকৰাৰ অভিযোগ উত্থাপন কৰিছে 20 আছাম ৰাইফলছৰ কামাণ্ডিং বিষয়াগৰাকীয়ে ৷ শীঘ্ৰেই অসম চৰকাৰৰ লগতে বান নিয়ন্ত্ৰণ বিভাগক নৈখনৰ খহনীয়া প্ৰতিৰোধ কৰিবলৈ আহ্বান জনোৱাৰ লগতে ৰাইজৰ সমস্যাৰ প্ৰতি গুৰুত্ব দিবলৈও আহ্বান জনাই সামৰিক বিষয়াগৰাকীয়ে ৷
