ৰঙাপৰাত ভয়ংকৰ পথ দুৰ্ঘটনা

শোণিতপুৰৰ ৰঙাপৰাৰ বৰপাট গাঁৱত ভয়ংকৰ পথ দুৰ্ঘটনা ৷ আমনিৰ পৰা তিনিচুকীয়ামুখী এখন চাৰিচকীয়া বাহনে নিয়ন্ত্ৰণ হেৰুৱাই চাইকেল এখনত খুন্দা মাৰে ৷ থিতাতে নিহত হয় চাইকেল আৰোহী আৰু গাড়ীখনত থকা এটি কিশোৰ ৷ মৃত কিশোৰটিৰ পিতৃ-মাতৃ গুৰুতৰভাৱে আহত হয় ৷ আহত দুয়োজনকে তেজপুৰ চিকিৎসালয়লৈ প্ৰেৰণ কৰে স্থানীয় ৰাইজে ৷

ৰঙাপৰা, 21 এপ্ৰিল : শোণিতপুৰ জিলাৰ ৰঙাপৰাৰ ১৫নং ৰাষ্ট্ৰীয় ঘাইপথত মঙলবাৰে পুৱাৰ ভাগত হোৱা এক শোকাৱহ পথ দূৰ্ঘটনাত থিতাতে নিহত হয় এজন চাইকেল আৰোহী আৰু এটি কিশোৰ । চাৰিদুৱাৰ আৰক্ষী থানাৰ অন্তৰ্গত বৰপাট গাঁৱত আমনিৰ পৰা তিনিচুকীয়ামুখী AS-12R-6546 নম্বৰৰ চাৰিচকীয়া বাহনে নিয়ন্ত্ৰণ হেৰুৱাই চাইকেল এখনত খুন্দা মাৰে আৰু গাড়ীখন দ-খাৱৈত বাগৰি পৰে ।

নিহত চাইকেল আৰোহীজন বৰপাটগাঁৱৰ নিবাসী ৰত্নেশ্বৰ শইকীয়া বুলি জানিব পৰা গৈছে। ইফালে দ-খাৱৈত গাড়ীখন বাগৰি পৰা গাড়ীখনত থকা ১১ বছৰীয়া ৰিহন বৰুৱা নামৰ কিশোৰটিৰ মৃত্যু হয়।

আনহাতে মৃত কিশোৰটিৰ মাতৃ ববিতা মিশ্ৰ বৰুৱা আৰু পিতৃ শিলা কুমাৰ বৰুৱা গুৰুতৰভাৱে আহত হয় । আহত ববিতা মিশ্ৰ বৰুৱা আৰু শিলা কুমাৰ বৰুৱাক স্থানীয় ৰাইজে উদ্ধাৰ কৰি তেজপুৰ চিকিৎসালয়লৈ প্ৰেৰণ কৰে বুলি জানিব পৰা গৈছে ।

লগতে পঢ়ক : নগাঁৱত প্ৰতিদিনে গৰু চোৰ,হাহাকাৰ ৰাইজৰ