তেজপুৰ, ১০ নৱেম্বৰ: প্ৰধানমন্ত্রী মৎস সম্পদ যোজনাৰ (Pradhan Mantri Matsya Sampada Yojana) অধীনত বৃহস্পতিবাৰে শোণিতপুৰ জিলাত ৰিভাৰ ৰেঞ্চিং এক কাৰ্যসূচী (River Ranching Program) অনুষ্ঠিত কৰা হয় । প্ৰধানমন্ত্ৰী মৎস্য সম্পদ যোজনাৰ ২০২১-২২ অধীনত শোণিতপুৰ জিলাৰ মীন বিভাগৰ দ্বাৰা ১৫ নং ৰাষ্ট্ৰীয় ঘাইপথৰ সমীপত গাভৰু নদীত এক লাখ মাছৰ পোনা মেলি দিয়া হয় ।
আজিৰ এই অনুষ্ঠানত শোণিতপুৰ জিলাৰ উপায়ুক্ত দেৱ কুমাৰ মিশ্ৰ আৰু তেজপুৰ বিধানসভা সমষ্টিৰ বিধায়ক পৃথ্বীৰাজ ৰাভা উপস্থিত থাকি আনুষ্ঠানিকভাৱে গাভৰু নদীৰ ঘাটত এই কাৰ্যসূচীৰ শুভাৰম্ভ কৰে । জিলা মীন উন্নয়ন বিষয়াগৰাকীয়ে কয় যে মাছৰ প্ৰজ্বনন ক্ষমতা বৃদ্ধি তথা বংশবৃদ্ধিৰ উদ্দেশ্যৰে এই কাৰ্যসূচী অনুষ্ঠিত কৰা হৈছে । জীয়ন দিয়া মাছে প্ৰাকৃতিক জলাশয়ত প্ৰজননৰ জৰিয়তে মাছৰ উৎপাদন বৃদ্ধি কৰিব বুলি আশা প্ৰকাশ কৰি আঁচনিখন সাফল্য মণ্ডিত কৰাৰ ক্ষেত্ৰত ৰাইজৰ সহায় সহযোগিতাৰ আশা প্ৰকাশ কৰে ।