উত্তৰ ছিকিমত ভাৰতীয় সেনাবাহিনীৰ অভিযানত উদ্ধাৰ চাৰি ক্ৰু মেম্বাৰ

প্ৰায় ১৫,৫০০ ফুট উচ্চতাত উত্তৰ ছিকিমৰ দুৰ্গম বৰফাবৃত অঞ্চলত প্ৰতিকুল বতৰৰ বাবে আবদ্ধ হৈছিল বায়ুসেনা বাহিনীৰ এখন হেলিকপ্তাৰৰ লগতে চাৰিজন ক্ৰু মেম্বাৰ ৷ আবদ্ধ দলটোক উদ্ধাৰৰ বাবে এক অভিযান চলোৱা হয় ভাৰতীয় বায়ু সেনাই ৷

তেজপুৰ, ৯ মে’ : ভাৰতীয় সেনা বাহিনী,বায়ু সেনা বাহিনী আৰু আইটিবিপিৰ নেতৃত্বত চলিল এক উদ্ধাৰ অভিযান ৷ প্ৰাপ্ত তথ্য অনুসৰি, প্ৰায় ১৫,৫০০ ফুট উচ্চতাত উত্তৰ ছিকিমৰ দুৰ্গম বৰফাবৃত অঞ্চলত আবদ্ধ বায়ুসেনা বাহিনীৰ এখন হেলিকপ্তাৰৰ লগতে চাৰিজন ক্ৰু মেম্বাৰৰ উদ্ধাৰৰ বাবে এই অভিযান চলোৱা হয় ৷

ভাৰতীয় সেনাবাহিনীৰ অভিযান

প্ৰতিৰক্ষা বিভাগৰ গুৱাহাটীৰ মুখপাত্ৰ লেঃ কৰ্ণেল পি খোংচায়ে এই তথ্য প্ৰকাশ কৰে ৷ প্ৰতিকুল বতৰৰ বাবে বায়ু সেনা বাহিনীৰ ক্ৰু মেম্বাৰ কেইজনে জৰুৰীভাৱে উক্ত স্থানত অৱতৰণ কৰিছিল ৷ সেনাবাহিনীৰ দলটো পৰৱৰ্তী সময়ত প্ৰচণ্ড বৰফৰ ধুমুহাৰ সন্মুখীন হোৱা বুলি জনায় ৷ ইয়াৰ পিছতে আইটিবিপি আৰু সেনাবাহিনীৰ দলে শুকুৰবাৰে সন্ধিয়া বায়ুসেনাৰ এই চাৰিজনীয়া দলটোক উদ্ধাৰ কৰিবলৈ সক্ষম হয় ৷ উল্লেখ্য যে,প্ৰতি মুহুৰ্তত হোৱা বৰফৰ বৰষুণ আৰু দুৰ্গম পাহাৰৰ বাবে সেনা বাহিনীৰ দলটোক উদ্ধাৰ সামগ্ৰী সহিতে পদপথেদি যাত্ৰা কৰি গন্তব্য স্থানত উপনীত হ'বলৈ বহু বাধাৰ সন্মুখীন হ’বলগীয়া হৈছিল ৷

লগতে চাওকঃলক্ ডাউনৰ সময়ত তীব্ৰ খাদ্য সংকটত ভুগিছে নলবাৰীৰ এটা পৰিয়াল