ৰঙাপৰা,21মেঃ মহামাৰী কৰ‘না ভাইৰাছে মানৱ জাতিলৈ দুৰ্যোগ কঢ়িয়াই অনাৰ সময়তে অন্য এক দুৰ্যোগ নামি আহিছে কৃষক সকলৰ মাজলৈ বৰষুণ নোহোৱাৰ ফলত ৰঙাপৰাৰ কৃষক ৰাইজে কঠীয়া সিঁচিব নোৱাৰি হাহাকাৰ কৰিবলগীয়া হৈছে । জেঠ মাহৰ প্ৰথমটো সপ্তাহত অতিক্ৰম কৰাৰ পাছতো ভালদৰে বৰষুণ নোহোৱাৰ ফলত কৃষক ৰাইজে কঠীয়া সিঁচিব পৰা নাই । বতৰৰ ওপৰত নিৰ্ভৰশীল কৃষক ৰাইজে শুকান পথাৰ খনলৈ চাই দিন অতিবাহিত কৰিব লগীয়া হৈছে ।
দেশে স্বাধীনতা লাভ কৰা প্ৰায় ৭৩ বছৰ অতিক্ৰম কৰাৰ পিছতো দেশৰ অৰ্থনৈতিক দিশত গুৰুত্বপূৰ্ণ ভূমিকা পালন কৰি অহা কৃষক ৰাইজৰ সমস্যাৰাজি আজিও সমাধান নোহোৱাৰ অভিযোগ উঠিছে । যাৰ ফলত কৃষক ৰাইজে আজিও বৰষুণৰ পানীৰ ওপৰতে ভৰষা কৰি কৃষি কাৰ্য কৰি থাকিবলগীয়া হৈছে । ৰঙাপৰাৰ ফুলগুৰিৰ আমতল গাঁৱত শ শ হেক্টৰ কৃষি ভূমি পানীৰ অভাৱত খৰাং হৈ পৰি আছে বৃহত্তৰ অঞ্চলটোৰ শতাধিক কৃষকে পানীৰ অভাৱত খেতি পথাৰত নামিব পৰা নাই । আনহাতে ফুলগুৰি অঞ্চলত প্ৰকৃত কৃষকে প্ৰধানমন্ত্ৰী কিষাণ সন্মান নিধি আঁচনিয়ে ঢুকি নাপালে । লক ডাউনৰ সময়ত একাংশ কৃষকে আৰ্থিক সংকটত ভূগিবলগীয়াত পৰিছে ।