Convocation of Tezpur University : 1,247 গৰাকী ছাত্ৰ-ছাত্ৰীক ৰাষ্ট্ৰপতিয়ে প্ৰদান কৰিলে মানপত্ৰ

ৰাষ্ট্ৰপতি ৰামনাথ কোবিন্দৰ অসম ভ্ৰমণৰ শনিবাৰে দ্বিতীয় দিন ৷ কাৰ্যসূচী অনুসৰি, পত্নী-জীয়ৰীৰ সৈতে অসমলৈ অহা ৰাষ্ট্ৰপতি কোবিন্দে শনিবাৰে পুৱা উপস্থিত হয় তেজপুৰ বিশ্ববিদ্যালয়ত (President Ramnath Kovind at Tezpur University) ৷ কেন্দ্ৰীয় বিশ্ববিদ্যালয়খনৰ দীক্ষান্ত সমাৰোহ (Convocation of Tezpur University) ত অংশগ্ৰহণ কৰাৰ পিছত ৰাষ্ট্ৰপতিগৰাকী ৰাওনা হয় কাজিৰঙা ৰাষ্ট্ৰীয় উদ্যানলৈ ৷ ৰাষ্ট্ৰপতিগৰাকীয়ে বিশ্ববিদ্যালয়খনৰ ছাত্ৰ-ছাত্ৰীসকলক উদ্দেশ্যি অসমীয়াতে ভাষণ প্ৰদান কৰে ৷

তেজপুৰ, 26 ফেব্ৰুৱাৰী :দুদিনীয়া ভ্ৰমণসূচীৰে অসমলৈ অহা ৰাষ্ট্ৰপতি ৰামনাথ কোবিন্দ শনিবাৰে পুৱা উপস্থিত হয় তেজপুৰ বিশ্ববিদ্যালয়ত (President Ramnath Kovind at Tezpur University) ৷ কেন্দ্ৰীয় বিশ্ববিদ্যালয়খনৰ 19 তম সমাৱৰ্তন সমাৰোহ (Convocation of Tezpur University) ত অংশগ্ৰহণ কৰি ৰাষ্ট্ৰপতিগৰাকী আপ্লুত হৈ পৰে ৷ প্ৰাকৃতিক আঁকৰৰে ভৰপুৰ তেজপুৰ বিশ্ববিদ্যালয়ৰ সৌন্দৰ্যত মুগ্ধ হোৱা ৰাষ্ট্ৰপতিগৰাকীয়ে অসমলৈ আহি আনন্দিত হোৱা বুলি উল্লেখ কৰে ৷

ছাত্ৰ-ছাত্ৰীসকলক অসমীয়াতে শুভেচ্ছা জ্ঞাপন কৰি ৰাষ্ট্ৰপতি কোবিন্দে তেজপুৰৰ ত্ৰিমূৰ্তি ক্ৰমে ৰূপকোঁৱৰ জ্যোতিপ্ৰসাদ আগৰৱালা, কলাগুৰু বিষ্ণুপ্ৰসাদ ৰাভা, নটসূৰ্য্য ফণী শৰ্মা আৰু ভাৰতৰত্ন ড৹ ভূপেন হাজৰিকাৰ প্ৰসংগৰে ভাষণ আৰম্ভ কৰে ৷ ৰাষ্ট্ৰপতি কোবিন্দে অনুষ্ঠানত উপস্থিত বিশ্ববিদ্যালয়খনৰ পৰা ডিগ্ৰী আৰু ডিপ্ল’মা লাভ কৰা ছাত্ৰ-ছাত্ৰীৰ পিতৃ-মাতৃসকলক অভিবাদন জনায় ৷

ইয়াৰ পিছতে ভাষণ প্ৰসংগত দেশৰ ৰাষ্ট্ৰপতি গৰাকীয়ে কয় যে, অসম বহুতো সম্ভাৱনাপূৰ্ণ ৰাজ্য ৷ প্ৰাকৃতিক সম্পদ বিকাশৰ লগতে অসমৰ থলুৱা কৃষি ব্যৱস্থা লেখত ল’বলগীয়া ৷ অসমৰ জহা চাউল আৰু তেজপুৰৰ আনাৰসৰ উৎপাদনৰ ক্ষেত্ৰত এক সুকীয়া পৰিচয় আছে ৷ যাৰ বাবে বৰ্তমান বিশ্ববিদ্যালয়ৰ ফুড প্ৰচেছিং বিভাগৰ গ’ল্ড মেডেল পোৱা ছাত্ৰ-ছাত্ৰীৰ বাবে এটা ভাল সুবিধা আছে বুলি মন্তব্য কৰে ৰাষ্ট্ৰপতিগৰাকীয়ে ৷

শনিবাৰে তেজপুৰ বিশ্ববিদ্যালয়ৰ দীক্ষান্ত সমাৰোহত সৰ্বমুঠ 1,247 গৰাকী ছাত্ৰ-ছাত্ৰীৰ ভিতৰত 47 গৰাকীয়ে সোণৰ পদক লাভ কৰে ৷ ইয়াৰ ভিতৰত 16 গৰাকী আন্তৰাষ্ট্ৰীয় শিক্ষাৰ্থীয়ে ডিগ্ৰী-ডিপ্ল’মা লাভ কৰে ৷ উল্লেখযোগ্য যে, বিশ্ববিদ্যালয়ৰ সমাৱৰ্তনত ভাগ লোৱা দেশৰ চতুৰ্থগৰাকী ৰাষ্ট্ৰপতিৰূপে পৰিচিত হৈছে ৰামনাথ কোবিন্দ ৷ বিশ্ববিদ্যালয়ৰ আচাৰ্য তথা ৰাজ্যপাল প্ৰফেচৰ জগদীশ মুখীয়ে দেশৰ ৰাষ্ট্ৰপতিগৰাকীৰ পৰিদৰ্শনক শলাগ লয় ৷

বিশ্ববিদ্যালয়ৰ উপাচাৰ্য প্ৰফেচৰ ভি কে জৈনে তেওঁৰ ভাষণত কয় যে, 1994 চনৰ 21 জানুৱাৰীত স্থাপিত হৈছিল তেজপুৰ বিশ্ববিদ্যালয় ৷ প্ৰায় ২৭ টা গৌৰৱোজ্জ্বল ইতিহাস পাৰ কৰা বিশ্ববিদ্যালয়খনত সম্প্ৰতি 4,597 গৰাকী ছাত্ৰ-ছাত্ৰীৰ ভিতৰত মুঠ 26 টা বিভাগত 75 টা একাডেমীক প্ৰগ্ৰেম চলি আছে ৷ তাৰোপৰি 4 খন স্কুলৰ 5 টা একাডেমীক কেন্দ্ৰ আছে ৷ লগতে তেওঁ কয়, বৰ্তমান 2020-21 বৰ্ষত বিশ্ববিদ্যালয়ত মুঠ 344 খন গৱেষণা পত্ৰ আৰু উচ্চমানৰ জাৰ্ণেলৰ উপৰিও 111 খন বিশেষ কিতাপ প্ৰকাশ পায় ৷

বিশ্ববিদ্যালয়ৰ সমাৱৰ্তন অনুষ্ঠানত উপস্থিত থাকি অসমৰ মুখ্যমন্ত্ৰী ড৹ হিমন্ত বিশ্ব শৰ্মাই ঘোষণা কৰে যে, তেজপুৰ বিশ্ববিদ্যালয়ত অত্যাধুনিক এক ক্ৰীড়া প্ৰকল্পৰ বিষয়ে উপাচাৰ্য আৰু মুখ্যমন্ত্ৰীৰ লগত হোৱা আলোচনাৰ পিছত শনিবাৰে এই অত্যাধুনিক এক ক্ৰীড়া প্ৰকল্প ৰাজ্য চৰকাৰে নিৰ্মাণ কৰিব ৷

উল্লেখযোগ্য যে, বিশ্ববিদ্যালয়খনত ১৯৯৮ চনত তেতিয়াৰ ৰাষ্ট্ৰপতি কে আৰ নাৰায়ণন প্ৰথমবাৰৰ বাবে উপস্থিত হৈ ছাত্ৰ-ছাত্ৰীক ডিগ্ৰী-ডিপ্ল’মা প্ৰদান কৰিছিল ৷ ইয়াৰ পিছত ক্ৰমে দেশৰ প্ৰাক্তন ৰাষ্ট্ৰপতি ড৹ এ পি জে আব্দুল কালাম আৰু প্ৰণৱ মুখাৰ্জীয়ে তেজপুৰ বিশ্ববিদ্যালয়ৰ দীক্ষান্ত সমাৰোহত অংশগ্ৰহণ কৰিছিল ৷

লগতে চাওক:সপত্নীক দেশৰ ৰাষ্ট্ৰপতি ৰামনাথ কোবিন্দৰ দুদিনীয়া অসম ভ্ৰমণৰ কাৰ্যসূচী