তেজপুৰ , 10 এপ্ৰিলঃ তেজপুৰ লোকসভা সমষ্টিৰ প্ৰথম পৰ্যায়ৰ নিৰ্বাচনৰ বাবে ইতিমধ্যে বিষয়া কৰ্মচাৰীসকল তেজপুৰ দৰং মহাবিদ্যালয়ৰ পৰা 1,880 টা ভোট গ্ৰহণ কেন্দ্ৰলৈ যাত্ৰা আৰম্ভ কৰিছে ৷ এই নিৰ্বাচনত 14,98,878 ভোটাৰে নিৰ্ণয় কৰিব 7 জন প্ৰাৰ্থীৰ ভাগ্য ৷
তেজপুৰ লোকসভাৰ নিৰ্বাচনী বিষয়া তথা শোণিতপুৰ জিলা উপায়ুক্ত নাৰসিং পাৱাৰে জনোৱা অনুসৰি শোণিতপুৰ জিলাৰ পাঁচটা বিধানসভা সমষ্টিৰ বাবে 1,118 টা ভোট কেন্দ্ৰ আছে ৷ উল্লেখ্য যে তেজপুৰ বিধানসভাত মুঠ 1,80,319 ভোটাৰৰ বিপৰীতে 227 টা ভোট কেন্দ্ৰ আছে আৰু ইয়াৰে ভিতৰত 30 টা মহিলাৰ বাবে সংৰক্ষিত ভোট কেন্দ্ৰ ৷ ইপিনে ঢেকীয়াজুলিত 2, 3,737 ভোটাৰৰ বিপৰীতে ভোট কেন্দ্ৰ 253 টা,ৰঙাপৰা সমষ্টিৰ 1,55,365 ভোটাৰৰ বাবে 197 টা, চতিয়া সমষ্টিৰ ভোটাৰ 1,80,463টা আৰু ভোট কেন্দ্ৰৰ সংখ্যা 228 টা ৷ আনহাতে বৰচলা সমষ্টিৰ 1,61,677 ভোটাৰৰ বাবে আছে 213 টা ভোট কেন্দ্ৰ ৷ বিশ্বনাথ জিলাত তিনিটা বিধানসভা সমষ্টিৰ ভিতৰত বিশ্বনাথ সমষ্টিত মুঠ ভোটাৰৰ সংখ্যা 1,57,254 আৰু ভোট কেন্দ্ৰৰ সংখ্যা 198 টা ৷ ইপিনে বিহালী সমষ্টিৰ মুঠ ভোটাৰৰ সংখ্যা 1,19,949 আৰু ভোট কেন্দ্ৰ 154 টা, গহপুৰ সমষ্টিৰ 1,90,897 ভোটাৰৰ বিপৰীতে আছে 228 টা ভোট কেন্দ্ৰ ৷ ইয়াৰোপৰি তেজপুৰ লোকসভাৰ অন্তৰ্গত লখিমপুৰ জিলাৰ বিহপুৰীয়া বিধানসভা সমষ্টিত 1,45,227টা ভোটাৰৰ বিপৰীতে আছে 182 টা ভোট কেন্দ্ৰ ৷ উল্লেখ্য যে ইয়াত মুঠ 6,112 গৰাকী কৰ্মচাৰী নিযুক্ত হৈ আছে ।