তেজপুৰ, 26 ডিচেম্বৰঃপ্ৰথম বাৰৰ বাবে তেজপুৰ লোকসভা সমষ্টিৰ সাংসদ পল্লৱ লোচন দাসে সংশোধিত নাগৰিকত্ব আইনৰ বিৰুদ্ধে চলি থকা আন্দোলনৰ ওপৰত প্ৰতিক্ৰিয়া প্ৰকাশ কৰিছে ৷ বুধবাৰে সাংসদ গৰাকীয়ে তেজপুৰ আৱৰ্ত ভৱনত উপস্থিত হৈ বিজেপিৰ কাৰ্যকৰ্তা সকলৰ লগত এক সুকীয়া আলোচনাত মিলিত হয় ৷
সংশোধিত নাগৰিকত্ব আইনৰ ওপৰত পল্লৱ লোচন দাসৰ প্ৰতিক্ৰিয়া তেওঁ কয় যে, অগণতান্ত্ৰিক পন্থাৰ আন্দোলন চৰকাৰে কোনো কাৰণত মানি নলয় । লগতে তেওঁ কয় যে সদৌ অসম ছাত্ৰ সন্থাই আৰু জাতীয়তাবাদী যুৱ ছাত্ৰ পৰিসদৰ লগতে সকলো ছাত্ৰ সংগঠনে এই গণতান্ত্ৰিক আন্দোলনক সন্মান কৰে । ইয়াৰোপৰিও তেওঁ কয় যে সকলোৰে আন্দোলন কৰাৰ অধিকাৰ আছে আৰু চৰকাৰে শুনাৰো প্ৰয়োজন আছে । তেওঁ উল্লেখ কৰে যে চৰকাৰে এই আন্দোলন শুনিছে, কিন্তু এতিয়া এই বিষয়তো উচ্চতম ন্যায়ালয়ৰ অধীনত আছে ৷ আগন্তুক 2010 চনৰ 22 জানুৱাৰীত উচ্চতম ন্যায়ালয়ে যি ৰায় বা নিৰ্দেশ দিব সেয়া চৰকাৰেও মানিব আৰু সকলোৱে মানিব বুলি সাংসদ গৰাকীয়ে মন্তব্য কৰে ।
