ৰঙাপৰা , 21 মে':শোণিতপুৰ জিলাৰ মিছামাৰীৰ, বিদ্যুৎ নথকা এখন গাঁৱৰ এগৰাকী ছাত্ৰী আজি জিলিকি উঠিছে গাঁওখনত ৷ টিপচাকী আৰু বজাৰত কিনিবলৈ পোৱা সৰু চাৰ্জ লাইটৰ পোহৰত অধ্যয়ন কৰি ধনখনা উচ্চ মাধ্যমিক বিদ্যালয়ৰ ছাত্ৰী গৰাকীয়ে নিজৰ সাফল্যৰে বিদ্যুৎ নথকা অতি ভিতৰুৱা গাওঁখনলৈ সুনাম কঢ়িয়াই আনিছে ৷
মিছামাৰীৰ এখন ভেঞ্চাৰ স্কুলত শিক্ষকতা কৰা চন্দ্ৰ কুমাৰ ৰায় আৰু কমলা ৰায়ৰ কন্যা নিৰ্মলা ৰায়ে সদ্য ঘোষিত হাইস্কুল শিক্ষান্ত পৰীক্ষাত তিনিটা বিষয়ত সৰ্বোচ্চ নম্বৰ লাভ কৰি ষ্টাৰ মাৰ্ক সহ প্ৰথম বিভাগত উত্তীৰ্ণ হৈছে ৷ উল্লেখ্য যে নিৰ্মলা ৰায়j পিতৃয়ে এখন ভেঞ্চাৰ স্কুলত বিগত 15 বছৰে বিনা বেতনে শিক্ষকতা কৰি পৰিয়ালটোক পোহপাল দি আহিছে ৷ তথাপিও দৰিদ্ৰতাই কেতিয়াও নিৰ্মলা শিক্ষাৰ ক্ষেত্ৰত বাধা হ'ব নোৱাৰিলে ৷ কেন্দ্ৰীয় চৰকাৰৰ সৌভাগ্য আঁচনিয়ে ঢুকি নোপোৱা 1নং ধনখনা গাঁও খনলৈ দৰিদ্ৰ পৰিয়ালৰ কন্যা নিৰ্মলা ৰায়ে গৌৰৱ কঢ়িয়াই অনাত স্বাভাৱিকতে উৎফুল্লিত হৈ পৰিছে গাওঁবাসী ৷ মেধাৱী ছাত্ৰী নিৰ্মলা ৰায় এগৰাকী কণ্ঠশিল্পী হিচাপেও পৰিচিত ৷ শিক্ষাৰ সমান্তৰালকৈ ভৱিষ্যতে এগৰাকী জনপ্ৰিয় সংগীত শিল্পী হোৱাৰ মন পুহি ৰাখিছে ছাত্ৰী নিৰ্মলা ৰায়ে ৷
