তেজপুৰ, ২১ আগষ্ট :ৰাজ্য়ত নতুনকৈ আৰম্ভ হ'ব আদৰ্শ অংগনৱাড়ী কেন্দ্ৰ । সমগ্ৰ ৰাজ্যৰ লগতে শোণিতপুৰ জিলাত সামাজিক উন্নয়ন বিভাগৰ অধীনত শেহতীয়া কৈ অসম চৰকাৰৰ তৰফৰ পৰা আদৰ্শ অংগনবাড়ী কেন্দ্রৰ অনুমোদন কৰা হৈছে ।
এতিয়া আৰু জৰাজীৰ্ণ অৱস্থাত ছাত্র-ছাত্ৰীক পঢ়ুৱাব নালাগে । চৰকাৰে এই নতুনকৈ প্ৰদান কৰা অংগনৱাড়ী কেন্দ্ৰসমূহ সুন্দৰ পৰিবেশত গঢ় দিয়া হ'ব ।শোণিতপুৰ জিলাৰ পাঁচটা বিধানসভা সমষ্টিৰ অন্তৰ্গত ১০৫ টা এনে নতুন আদৰ্শ অংগনৱাড়ী কেন্দ্ৰ নিৰ্মাণৰ বাবে প্ৰস্তুতি হাতত লৈছে । এই সমষ্টি সমূহৰ বিধায়ক সকলৰ তত্বাৱধানত নিৰ্মাণ সম্পূৰ্ণ হ'বলগীয়া এই অংগনৱাড়ী কেন্দ্ৰ সমূহত থাকিব ছাত্ৰ-ছাত্ৰীৰ বাবে আছুতীয়া শৌচালয় ,পঢ়াশালি,ৰান্ধনী ঘৰ আৰু সকলোতে বৈদ্যুতিক সংযোগ ইত্যাদি ।
উল্লেখ্য় যে প্রতিটো কেন্দ্ৰৰ বাবদ ২৫ লাখ টকা প্ৰদান কৰা হৈছে । ইয়াৰ ভিতৰত ৭৫ হাজাৰ টকাৰে ছাত্ৰ- ছাত্ৰীৰ বাবে আছুতীয়া ডেস্ক,বেঞ্চ, আচবাব তৈয়াৰ কৰিব বাবে প্ৰদান কৰিব । ২৪ লাখ ৩০ হাজাৰ টকাৰ ভিতৰত এই কেন্দ্ৰ সমূহ নিৰ্মাণ কৰা হ'ব । প্রতিটো সমষ্টিত ২১ টাকৈ আৰু গ্ৰাম্য আন্তঃগাঁথনি উন্নয়ন পুঁজিৰ অধীনত ৪৮ টা কেন্দ্ৰ সংযোজন হ'ব । ইয়াৰে ১৯ টা বিশ্বনাথ চাৰিআলিত নিৰ্মাণ কৰা হ'ব । ইয়াৰ লগতে অনুচিত জাতি/জনজাতি শিতানতো আছুতীয়াকৈ নিৰ্মাণ কৰা হ'ব এই অংগনৱাড়ী কেন্দ্ৰ ।