তেজপুৰ, 10 জানুৱাৰী :সমগ্ৰমণিপুৰতে 9 জানুৱাৰীত নেশ্যনেল ৰিজেনেৰেশ্যন দিৱস পালন কৰা হয় ৷ দুদিনীয়া কাৰ্যসূচীৰে মঙলবাৰৰ পৰা পালন কৰা হয় এই দিৱস ৷ এই দিৱসৰ জৰিয়তে 1819-23 ৰ বাৰ্মিজ আক্ৰমণত নিহত মণিপুৰৰ বীৰ শ্বহীদক স্মৰণ কৰা হয় ৷ উল্লেখ্য যে, বাৰ্মিজসকলে কেইবাবাৰো মণিপুৰ আক্ৰমণ কৰিছিল যদিও আটাইতকৈ উল্লেখযোগ্য আছিল 1819 চনত, ৰজা মাৰ্জিতৰ ৰাজত্বকালত । 1819-26 চনলৈ বাৰ্মিজসকলে মণিপুৰ দখল কৰিছিল । এই সময়ছোৱাতে মণিপুৰ বিধ্বস্ত হৈ পৰিছিল আৰু সকলোতে বিশৃংখলতা আৰু অৰাজকতাৰ সৃষ্টি হৈছিল ।
জনসাধাৰণৰ ৰক্ষণাবেক্ষণ কৰি থকা বহু সাহসী পুৰুষক হত্যা কৰা হৈছিল, মণিপুৰী গাঁৱত অভিযান চলাওঁতে বহু নাৰী আৰু শিশু শত্ৰুৰ অত্যাচাৰৰ বলি হৈছিল আৰু বহু হাজাৰ হাজৰ লোকক যুদ্ধবন্দী হিচাপে বাৰ্মালৈ লৈ যোৱা হৈছিল যিসকলক তেওঁলোকৰ সামৰিক আৰু সামাজিক কামত ব্যৱহাৰ কৰা হৈছিল ।
মণিপুৰত হোৱা মানৰ এই আক্ৰমণৰ ফলত জাতীয়তাবাদৰ নতুন ভাৱ আৰু জাতীয় মুক্তিৰ নতুন মনোভাৱ গঢ় লৈ উঠিছিল । হীৰচন্দ্ৰৰ গেৰিলা যুদ্ধ আৰু দুই খুলশালীয়েক গম্ভীৰ সিং আৰু নাৰ্চিঙৰ জাতীয় মুক্তিযুদ্ধই বাৰ্মিজ দখলৰ সময়ত গঢ় লৈ উঠা নতুন জাতীয়তাবাদৰ ইতিহাস বৰ্তমান কাগজৰ পাতত । বাৰ্মাৰ দখল আৰু নিষ্ঠুৰতাক প্ৰত্যাহ্বান জনাই শ শ মণিপুৰী বীৰে অৱশেষত মণিপুৰে হেৰুৱা সাৰ্বভৌমত্ব পুনৰ লাভ কৰিব পাৰিল ৷ এইটোৱেই আছিল জাতীয় মুক্তিৰ সংগ্ৰামৰ মূল কথা ।