তেজপুৰ, 11 জুলাই : মঙলবাৰে মণিপুৰৰ মুখ্য সচিব ড৹ বিনীত যোশী আৰু মণিপুৰ চৰকাৰৰ নিৰাপত্তা উপদেষ্টা কুলদীপ সিঙে ৰাজ্যপাল অনুসূয়া উইকীক সাক্ষাৎ কৰে ৷ সাক্ষাতত তেওঁলোকে মণিপুৰৰ বৰ্তমানৰ পৰিস্থিতিৰ বিষয়ে বিষদভাৱে আলোচনা কৰে ৷
Manipur Violence: মুখ্য সচিব আৰু নিৰাপত্তা উপদেষ্টাৰ ৰাজ্যপালক সাক্ষাৎ
মণিপুৰ চৰকাৰৰ মুখ্য সচিব ড৹ বিনীত যোশী আৰু মণিপুৰ চৰকাৰৰ নিৰাপত্তা উপদেষ্টা কুলদীপ সিঙে মণিপুৰৰ ৰাজ্যপাল মিছ অনুসূয়া উইকীক সাক্ষাৎ কৰে আৰু তেওঁলোকে ৩ মে’ত সংঘটিত হোৱা জাতিগত সংঘৰ্ষৰ ফলত ৰাজ্যখনৰ আইন-শৃংখলাৰ শেহতীয়া পৰিস্থিতিৰ বিষয়ে ৰাজ্যপালক অৱগত কৰে ।
মুখ্য সচিব আৰু নিৰাপত্তা উপদেষ্টাৰ ৰাজ্যপালক সাক্ষাৎ
ৰাজ্যপালে তেওঁলোকৰ সৈতে এই বিষয়টোৰ ওপৰত আলোচনা কৰি সংশ্লিষ্ট সকলো অংশীদাৰক জড়িত কৰি এক সৌহাৰ্দ্যপূৰ্ণ আলোচনাৰ জৰিয়তে শান্তিপূৰ্ণ পৰিস্থিতি ঘূৰাই অনাৰ উপায়সমূহ অন্বেষণ কৰে । বহু আলোচনা-বিলোচনাৰ অন্তত ৰাজ্যপালে তেওঁলোকক চৰকাৰে তলত দিয়া কামবোৰ ক্ষিপ্ৰতাৰে কৰিবলৈ পৰামৰ্শ দিলে-
- গ্ৰহণ কৰা পদক্ষেপ আৰু সন্মুখীন হোৱা সমস্যাবোৰৰ প্ৰতিক্ৰিয়া প্ৰাপ্ত কৰিবলৈ নিৰীক্ষণ সমিতিৰ সাপ্তাহিক বৈঠক আহ্বান কৰা;
- পৰ্যাপ্ত সুৰক্ষা প্ৰদান কৰি কৃষি কাৰ্যকলাপৰ ব্যৱস্থা;
- অন্যান্য চিকিৎসা মহাবিদ্যালয়ত আসনৰ উপলব্ধতা অনুসৰি স্থানচ্যুত চিকিৎসা বিজ্ঞানৰ ছাত্ৰ-ছাত্ৰীসকলক ঠাই দিবলৈ ভাৰতীয় চিকিৎসা পৰিষদৰ কাষ চপা;
- শৰণাৰ্থীসকলক শাৰীৰিক আৰু মানসিকভাৱে সুস্থ কৰি ৰাখিবলৈ সকলো সাহায্য শিবিৰতে পৰ্যাপ্ত ঔষধ যোগান ধৰাৰ লগতে মনোৰঞ্জনৰ সঁজুলিও যোগান ধৰা; প্ৰতিজন স্থানচ্যুত ব্যক্তিক 1000/- টকাকৈ দিয়া, যাৰ ভিতৰত ইতিমধ্যে 500/- টকা মঞ্জুৰ কৰা হৈছে আৰু প্ৰয়োজন হ’লে পৰ্যাপ্ত দৈনিক অত্যাৱশ্যকীয় সামগ্ৰীৰ বাবে বাকী থকা 500/- টকাৰ মুকলি কৰাৰ ব্যৱস্থা কৰা,
- যদি প্ৰয়োজন হয়, ব্যৱসায়ীসকলক সংশ্লিষ্ট সাহায্য শিবিৰত অত্যাৱশ্যকীয় সামগ্ৰীবোৰ বিক্ৰী কৰিবলৈ নিৰ্দেশ দিয়া ;
- সেই স্থানচ্যুত লোকসকলৰ পুনৰ বসতি স্থাপনৰ ব্যৱস্থা কৰা আৰু তেওঁলোকৰ বাবে অস্থায়ী ঘৰ নিৰ্মাণ কৰাৰ লগতে ভুক্তভোগীসকলৰ বাবে ক্ষতিপূৰণ মুকলি কৰা ৷
- স্বায়ত্তশাসিত জিলা পৰিষদৰ নিৰ্বাচন অনুষ্ঠিত কৰিবলৈ ব্যৱস্থা কৰা;
- ৰাজ্যৰ নিৰাপত্তা পৰিস্থিতি নিৰীক্ষণৰ বাবে ড্ৰ’ন ব্যৱহাৰ কৰা;
- “No work, No Pay” ব্যৱস্থাৰ পুনৰীক্ষণ কৰা
- শান্তি আৰু স্বাভাৱিক অৱস্থা ঘূৰাই আনিবলৈ সকলো ৰাজনৈতিক দল, সকলো নাগৰিক সমাজ সংগঠন, সুৰক্ষা বাহিনী আদিৰ বৈঠক ৰাজভৱনত অনুষ্ঠিত কৰা ।
লগতে পঢ়ক :Army chief in Manipur: মণিপুৰৰ ৰাজ্যপালক সাক্ষাৎ সেনা প্ৰধানৰ