ৰঙাপৰা, 4 অক্টোবৰ : এটি বনৰীয়া হাতীৰ পোৱালি(Baby Wild Elephant) আৰু তিনিজনী মাইকী কুনকি হাতী(Kumki Elephant)ৰ মাজৰ এক হৃদয় জুৰ পৰা দৃশ্য ৷ নিজৰ সন্তান নহয় যদিও নিজ সন্তানৰ দৰেই হাতীৰ পোৱালিটোক বুকুৰ মাজত আঁকোৱালি লৈছে মাইকী কুনকি হাতী তিনিজনীয়ে ৷ এই দৃশ্য শোণিতপুৰ জিলাৰ ৰঙাপৰাৰ ৷
জানিব পৰা মতে, ৰঙাপৰাত বৃহৎ বনৰীয়া হাতীৰ জাক তথা মাতৃৰ বুকুৰ মাজৰ পৰা বিচ্ছিন্ন হৈছিল বনৰীয়া হাতীৰ পোৱালিটো । পোৱালিটোক জাকৰ মাজত মিলন কৰাৰ উদ্দেশ্যৰে বন বিভাগ(Forest Department)য়ে প্ৰচেষ্টা হাতত লয় । বৰষুণত তিতি আৰু ভোকে-পিয়াহে থাকি বন বিভাগৰ দলটোৱে হাতীৰ পোৱালীটোক সোনাই-ৰূপাই বন্যপ্ৰাণী অভয়াৰণ্য(Sonai Rupai Wildlife Sanctuary)ত থকা বনৰীয়া হাতীৰ জাকৰ সৈতে মিলন কৰাৰ লক্ষ্যৰে গাভৰু নৈ পাৰ কৰি মিছামাৰীৰ চামবাৰীলৈ নিয়া হৈছিল ৷
দুদিন পূৰ্বে ৰঙাপৰাৰ আমাৰিবাৰী আঞ্চলিক বন কাৰ্যালয়ৰ অধীনৰ ধেন্দাই চাহ বাগিচা(Dhendai Tea Estate)ৰ মাজত বনৰীয়া হাতীৰ পোৱালিটো অকলশৰীয়াকৈ ঘুৰি ফুৰিছিল । ঘটনাৰ সন্দৰ্ভত বন বিভাগে খবৰ লাভ কৰাত হাতীৰ পোৱালীটোক জাকৰ সৈতে মিলন কৰি দিয়াৰ বাবে এক প্ৰচেষ্টা হাতত লৈছিল যদিও সফল নহ’ল বন বিভাগ ।
ধেন্দাই চাহ বাগিচাৰ মাজত বিচৰণ কৰি থকা হাতীৰ পোৱালীটোক লৈ যোৱাৰ বাবে মিছামাৰীৰ গাভৰু খণ্ড বন কাৰ্যালয়ত থকা তিনিজনী মাইকী কুনকি হাতী ক্ৰমে জয়মালা, গীতা আৰু বনমালা উপস্থিত হয় । হাতী তিনিজনীৰ মাউত কেইজন আছিল ক্ৰমে- চন্দন, জিতু, আক্ৰাম আৰু অভিজ্ঞ ৰবি দাস । তিনিজনী কুনকি হাতীক দেখাৰ লগে লগে ধাননি পথাৰৰ মাজত থকা হাতীৰ পোৱালিটো আগবাঢ়ি আহে ৷