পুনৰ সন্ধানহীন বায়ুসেনাৰ এন্টনভ বিমান

2019-06-03 16:25:45

অৰুণাচলৰ মেচুকাৰ পৰা সন্ধানহীন বায়ুসেনাৰ বিমান

নিউজ ডেস্ক, 3 জুনঃ পুনৰ উত্তৰ-পূৰ্বাঞ্চলৰ আকাশমাৰ্গত অঘটন ৷ ভাৰতীয় বায়ু সেনাৰ এখন বিমান সোমবাৰে উৰণৰ ঠিক এঘন্টাৰ পিচৰে পৰাই সন্ধানহীন হৈ আছে ৷ বায়ু সেনাৰ শীৰ্ষ সূত্ৰই প্ৰকাশ কৰিছে এই তথ্য ৷ 

তথ্য অনুসৰি, বায়ু সেনাৰ এখন এন্টনভ 32 (AN 32) বিমান সোমবাৰে দিনৰ 12:25 বজাত যোৰহাট বায়ু সেনা চাউনীৰ পৰা উৰা মাৰে ৷  8গৰাকী বিমানকৰ্মী আৰু 5গৰাকী যাত্ৰী লৈ বিমানখনে অৰুণাচলৰ মেচুকা বিমান ঘাটিলৈ বুলি উৰা মাৰে  ৷  দিনৰ 1 বজাত বিমানখনে এয়াৰ ট্ৰেফিক কন্ট্ৰলৰ সৈতে শেষ যোগাযোগ সম্পন্ন কৰিছিল ৷ তাৰ পিচৰে পৰাই বিমানখন সন্ধানহীন হৈ আছে ৷ 

ইতিমধ্য়ে বিমানখনৰ সন্ধানহীন সম্পৰ্কে বায়ু সেনাৰ ভাইচ এয়াৰ চীফ এয়াৰ মাৰ্শ্বাল ৰাকেশ সিং ভাদুৰীয়াৰ সৈতে বাৰ্তালাপ কৰিছে প্ৰতিৰক্ষা মন্ত্ৰী ৰাজনাথ সিঙে ৷ বিমানখনৰ সন্ধান উলিয়াবলৈ প্ৰয়োজনীয় সকলো দিশ তদাৰক কৰিবলৈ নিৰ্দেশনা প্ৰেৰণ কৰিছে প্ৰতিৰক্ষা মন্ত্ৰীগৰাকীয়ে ৷  

প্ৰতিৰক্ষা মন্ত্ৰীৰ নিৰ্দেশৰ পিচতেই বায়ু সেনাৰ তৰফৰ পৰা বিমানখন সন্ধানহীন হোৱাৰ সকলো দিশ পৰীক্ষা কৰি থকা হৈছে ৷ সন্ধানহীন বিমানখন বিচাৰি উলিয়াবলৈ ছুখই 30 আৰু C-130 হাৰকুলিছ বিমান দুখনে তেজপুৰ বায়ু সেনা ঘাটিৰ পৰা মেচুকালৈ উৰা মাৰিছে ৷ 

2019-06-03 15:48:09

যোৰহাটৰ পৰা উৰা মৰা বিমানখন অৰুণাচলৰ মেচুকালৈ গৈছিল ৷

• অৰুণাচলৰ মেচুকাত পুনৰ সন্ধানহীন ভাৰতীয় বায়ু সেনাৰ বিমান ৷
• যোৰহাট বায়ু সেনা চাউনীৰ পৰা দিনৰ 12:25 মিনিটত উৰা মাৰিছিল বিমানখন ৷
• সন্ধানহীন বিমানখন বায়ু সেনাৰ AN-32 বুলি জানিব পৰা গৈছে ৷
• বায়ু সেনাৰ সূত্ৰই বিমানখনত 13গৰাকী বায়ু সেনা আছিল বুলি প্ৰকাশ কৰিছে ৷
• দিনৰ 1 বজাৰ পৰা বৰ্তমানলৈ বিমানখনৰ সৈতে সংযোগ বিচ্ছিন্ন হৈ আছে ৷
• ছুখই 30 আৰু C-130 হাৰকুলিছ বিমানৰ সহযোগত বৰ্তমানে বিমানখনৰ সন্ধান কৰি থকা হৈছে ৷