তেজপুৰত ৰাষ্ট্ৰীয় ডায়েলাইচিছ আঁচনিৰ শুভাৰম্ভণি ড0 হিমন্ত বিশ্ব শৰ্মাৰ

শনিবাৰে তেজপুৰ মেডিকেল কলেজ আৰু তেজপুৰ কনকলতা অসামৰিক চিকিৎসালয়ত শুভাৰম্ভণি কৰা হয় ৰাষ্ট্ৰীয় ডায়েলাইচিছ আঁচনিৰ । ছয় মাহৰ ভিতৰতে তেজপুৰ চিকিৎসা মহাবিদ্যালয়ত শৈল বিভাগৰ পি জি ডিপ্লোমা আৰম্ভ কৰাৰো আশ্বাস মন্ত্ৰীগৰাকীৰ ৷

তেজপুৰ, ১৫ জুন: শনিবাৰে স্বাস্থ্য আৰু বিত্তমন্ত্ৰী ডঃ হিমন্ত বিশ্ব শৰ্মাই তেজপুৰ মেডিকেল কলেজ আৰু তেজপুৰ কনকলতা অসামৰিক চিকিৎসালয়ত শুভাৰম্ভ কৰে প্ৰধানমন্ত্ৰী ৰাষ্ট্ৰীয় ডায়েলাইচিছ আঁচনি । তেজপুৰ চিকিৎসা মহাবিদ্যালয়ত এটা এম আৰ ই সেৱাৰ কেন্দ্ৰও মুকলি কৰে মন্ত্ৰী গৰাকীয়ে । লগতে, এই আঁচনি সম্পূৰ্ণ বিনামূলীয়া আৰু সকলোৰে বাবে উপলব্ধ হ'ব বুলি জানিবলৈ দিয়ে মন্ত্ৰী হিমন্ত বিশ্ব শৰ্মাই ।

উল্লেখ্য যে, উক্ত অনুষ্ঠানতে বছৰ বছৰ ধৰি কনকলতা অসামৰিক চিকিৎসালয়ত কাম কৰি অহা ৬০ গৰাকী অস্থায়ী কৰ্মচাৰীয়ে, তেওঁলোকৰ দাবী সম্বলিত এখন স্মাৰকপত্ৰ প্ৰদান কৰে মন্ত্ৰী হিমন্ত বিশ্ব শৰ্মাক ৷ স্মাৰকপত্ৰ গ্ৰহণ কৰি মন্ত্ৰী গৰাকীয়ে তেওঁলোকক উচ্চতম ন্যায়ালয়ৰ দোহাই দি কয় যে ইণ্টাৰভিউ অবিহনে কোনেও লাভ কৰিব নোৱাৰে চাকৰি ৷ ইয়াৰোপৰি তেজপুৰ চিকিৎসা মহাবিদ্যালয়ত উপস্থিত হৈ তেওঁ কয়, মহাবিদ্যালয়খনত অহা ছয় মাহৰ ভিতৰতে আৰম্ভ হ'ব শৈল বিভাগৰ পি জি ডিপ্ল’মা ।