মিছামাৰীত ভয়াৱহ অগ্নিকাণ্ড

জুইত ভষ্মীভূত এখন ব্যৱসায়িক প্ৰতিষ্ঠানৰ লগতে বাসগৃহ ৷ ঘটনাস্থলীত পলমকৈ উপস্থিত অগ্নিনিৰ্বাপক বাহিনী ৷ উত্তেজিত হৈ পৰে স্থানীয় ৰাইজ ৷

ৰঙাপৰা, 9 আগষ্টঃ শোণিতপুৰ জিলাৰ মিছামাৰীত শুকুৰবাৰে সংঘটিত হয় এক ভয়াৱহ অগ্নিকাণ্ড । নিশা প্ৰায় ৮ বজাত মিছামাৰীৰ ২ নং ধানমৰাৰ তুৰিবস্তিৰ নিৱাসী জহুৰউদ্দিন আনচাৰী নামৰ ব্যক্তিগৰাকীৰ এখন ব্যৱসায় প্ৰতিষ্ঠানত অগ্নিকাণ্ডৰ সূত্ৰপাত হয় । স্থানীয় ৰাইজে জুই প্ৰশমনৰ বাবে অগ্নিনিৰ্বাপক বাহিনীক খবৰ দিয়ে যদিও সময়ত অগ্নিনিৰ্বাপক বাহিনী উপস্থিত নোহোৱাত লোকগৰাকীৰ বাসগৃহলৈও বিয়পি পৰে জুই৷ অৱশেষত, মিছামাৰী সেনা ছাউনীৰ পৰা অহা অগ্নিনিৰ্বাপক বাহিনীৰ গাড়ীয়ে জুই নিৰ্বাপণ কৰিবলৈ সক্ষম হয় যদিও ইতিমধ্যে সম্পূৰ্ণৰূপে ভষ্মীভূত হৈ পৰে ব্যৱসায় প্ৰতিষ্ঠানৰ লগতে জহুৰউদ্দিন আনচাৰীৰ বাসগৃহ ৷

ইফালে, অগ্নিনিৰ্বাপক বাহিনী পলমকৈ উপস্থিত হোৱাত উত্তেজিত হৈ পৰে স্থানীয় ৰাইজ ৷ পৰিস্থিতি নিয়ন্ত্ৰণ কৰিবলৈ ঘটনাস্থলীত উপস্থিত হয় মিছামাৰী আৰক্ষী৷