ৰঙাপৰা,21 মে’: কৰ’ণা মহামাৰীৰ সংক্ৰমণৰ প্ৰতি লক্ষ্য ৰাখি ৰাজ্য চৰকাৰে জাৰি কৰা সান্ধ্য আইনৰ সুৰুঙা লৈ ৰাজ্যৰ ভিন্ন প্ৰান্তত একাংশ দুষ্টচক্ৰই চলাই আছে মদ, জুৱা তথা ড্ৰাগছৰ ৰমৰমীয়া বেহা ।
দীৰ্ঘদিন ধৰি আৰক্ষী প্ৰশাসনৰ চকুত ধুলি দি এই অসাধু চক্ৰই চলাই আছে নিচাযুক্ত দ্ৰব্যৰ অবাধ বেহা । শেহতীয়াকৈ শোণিতপুৰ জিলাৰ লখৰাত চাৰিদুৱাৰ আৰক্ষীয়ে এক অভিযান চলাই বৃহৎ পৰিমাণৰ ব্ৰাউন চুগাৰসহ দুজন লোকক আটক কৰিছে ।
শোণিতপুৰৰ লখৰাত বৃহৎ পৰিমাণৰ ড্ৰাগছসহ দুজনক আটক
এক গোপন সূত্রৰ পম খেদি চাৰিদুৱাৰ আৰক্ষীয়ে লখৰাৰ ৰাজপথত তালাচী চলাই থকাৰ সময়তে এখন তীব্ৰবেগত আহি থকা নম্বৰপ্লেটবিহীন এল্ট’ গাড়ীক ৰ’বলৈ নিৰ্দেশ দিয়ে আৰক্ষীয়ে ৷ গাড়ীখনে আৰক্ষীৰ নিৰ্দেশ নামানি তীব্ৰবেগত পলায়নৰ চেষ্টা কৰে ৷ ঘটনাস্থলীত উপস্থিত থকা আৰক্ষীৰ দলে খেদি খেদি চালকসহ গাড়ীখন কৰায়ত্ত কৰিবলৈ সক্ষম হয় ৷