তেজপুৰ, 6 এপ্ৰিল: তিনিদিনীয়া অসম ভ্ৰমণসূচীৰে আজি কাজিৰঙাত উপস্থিত হ’ব দেশৰ ৰাষ্ট্ৰপতি দ্ৰৌপদী মূৰ্মু ৷ কিন্তু ৰাষ্ট্ৰপতিগৰাকী কাজিৰাঙাত উপস্থিত হোৱাৰ পূৰ্বেই বদলি কৰা হৈছে ৰাজ্যৰ মুখ্য বন সংৰক্ষকক ৷ মুখ্য বন সংৰক্ষক মহেন্দ্ৰ কুমাৰ যাদৱৰ ঠাইত তৎকালীনভাৱে দায়িত্ব গ্ৰহণ কৰে সন্দীপ কুমাৰে ৷ 1 এপ্ৰিলৰ পৰা কাৰ্যকৰী হোৱাকৈ সন্দীপ কুমাৰক দায়িত্ব দিয়া হৈছে নতুন মুখ্য বন্যপ্ৰাণী ৱাৰ্ডেন হিচাবে (Sandip Kumar appointed as Assam CWLW) ৷
এক জাননী যোগে কোৱা হৈছে যে, “জনসেৱাৰ স্বাৰ্থত সন্দীপ কুমাৰ, আই এফ এছ (আৰ আৰ: 1989), মুখ্য বন সংৰক্ষক (বন্যপ্ৰাণী আৰু জৈৱ-বৈচিত্ৰ) সহ প্ৰকল্প সঞ্চালক, অসম প্ৰজেক্ট অন ফৰেষ্ট আৰু জৈৱ বৈচিত্ৰ সংৰক্ষণ সমিতি, এতিয়াৰ পৰা তাৎক্ষণিকভাৱে কাৰ্যকৰী হোৱাকৈ পৰৱৰ্তী নিৰ্দেশনা নিদিয়া পৰ্যন্ত মুখ্য বন্যপ্ৰাণী ৱাৰ্ডেন (Chief wildlife warden)ৰ দায়িত্ব গ্ৰহণ কৰিব ৷’’
জাননীত লগতে কোৱা হৈছে, ‘‘চিফ ৱাইল্ড লাইফ ৱাৰ্ডেন (CWLW)ৰ অতিৰিক্ত দায়িত্বত থকা মহেন্দ্ৰ কুমাৰ যাদৱ, আই এফ এছ (আৰ আৰ:1989), মুখ্য সংৰক্ষক আৰু বন বাহিনীৰ মুৰব্বীয়ে এই দায়িত্ব সন্দীপক অৰ্পণ কৰিব লাগিব ৷ ইয়াৰ উপৰিও আই এফ এছৰ সন্দীপ কুমাৰে বন আৰু জৈৱ বৈচিত্ৰ সংৰক্ষণ সমিতিৰ অসম প্ৰকল্পৰ প্ৰকল্প সঞ্চালকৰ দায়িত্ব গ্ৰহণ কৰি যাব (Assam CWLW MK Yadav removed) ৷’’