তেজপুৰ, 4 জুন : কাৰাগাৰত সাধাৰণতে কয়দীসকলৰ বাবে বিভিন্ন শাস্তিমূলক ব্যৱস্থা গ্ৰহণ কৰে কাৰাগাৰ কৰ্তৃপক্ষই ৷ প্ৰতিজন কয়দীকে তেওঁলোকে কৰা অপৰাধ অনুযায়ী শাস্তি বিহা পৰিলক্ষিত হয় ৷ কিন্তু কাৰাগাৰত কয়দীক শাস্তি হিচাপে শৈক্ষিক জ্ঞান প্ৰদান কৰা শুনিছেনে ?
কথাতে কোৱা হয়, অল্প বিদ্যা ভয়ংকৰী ৷ শেহতীয়াকৈ উত্তৰ-পূবক সমালোচনা কৰি পঞ্জাৱৰ লুধিয়ানাৰ এজন ইউটিউবাৰ আটক হোৱাৰ পাচতে এতিয়া কাৰাগাৰত ইউটিউবাৰ যুৱকজনক উত্তৰ-পূব সম্বন্ধে সাধাৰণ জ্ঞান প্ৰদান কৰিছে অৰুণাচল প্ৰদেশ আৰক্ষীয়ে ৷ অৰুণাচল তথা উত্তৰ-পূব সম্পৰ্কে ভৌগলিক জ্ঞান নথকা পাৰশ সিং নামৰ 21 বছৰীয়া ইউটিউবাৰজনে 22 মে’ত প্ৰাক্তন কেন্দ্ৰীয় মন্ত্ৰী আৰু বৰ্তমানৰ কংগ্ৰেছৰ বিধায়ক নিনং এৰিঙৰ বিৰুদ্ধে ইউটিউব চেনেলযোগে বৰ্ণ বৈষম্যমূলক মন্তব্য প্ৰদান কৰিছিল ৷ লগতে অৰুণাচল প্ৰদেশ চীনৰ অংশ বুলি কৈ দেশদ্ৰোহী মন্তব্য কৰিছিল ইউটিউবাৰজনে ৷
এই বৰ্ণ বৈষম্যমূলক মন্তব্যৰ পাচতে সামাজিক মাধ্যমত সৃষ্টি হয় হাহাকাৰ ৷ কেন্দ্ৰীয় মন্ত্ৰী কিৰেণ ৰিজিজু আৰু অন্য শীৰ্ষ নেতৃত্বৰ নিৰ্দেশমৰ্মে পঞ্জাৱ আৰক্ষীৰ সহযোগত অৰুণাচল প্ৰদেশ আৰক্ষীয়ে আটক কৰে পাৰশ সিঙক ৷ সম্প্ৰতি কাৰাগাৰত বন্দী হৈ থকা পাৰশ সিঙক দিয়া হৈছে দৈনিক কাউঞ্চেলিং ৷ কাৰাগাৰৰ ভিতৰতে পাৰশক উত্তৰ-পূব তথা অৰুণাচল প্ৰদেশৰ বিষয়ে দিয়া হৈছে সম্যক জ্ঞান ।