তেজপুৰ, ৪ জানুৱাৰী : বিগত সময়চোৱাত চীনে ভাৰতৰ সীমান্তত আন্তঃগাঁথনি নিৰ্মাণ তীব্ৰতৰ কৰি তোলাৰ সময়তে ভাৰতেও চীনৰ সীমান্তৱৰ্তী(Indo China border) এলেকাত উন্নত প্ৰযুক্তিৰ আন্তঃগাঁথনি নিৰ্মাণ অধিক ক্ষীপ্ৰ কৰি তুলিছে । চীনৰ সীমান্তৱৰ্তী ভাৰতৰ 3488 কিলোমিটাৰ অঞ্চলত ভাৰত চৰকাৰে নিৰ্মাণ কাৰ্যত অধিক গুৰুত্ব প্ৰদান কৰিছে ৷ শেহতীয়াকৈ অৰুণাচল প্ৰদেশৰ সীমান্তৱৰ্তী অঞ্চলত কেবাখনো গুৰুত্বপূৰ্ণ সংযোগী দলঙৰ নিৰ্মাণ বৰ্ডাৰ ৰোডছ অৰ্গেনাইজেশ্যনে (BRO) সম্পূৰ্ণ কৰিছে(construction in indo china border) ।
মঙলবাৰে দেশৰ প্ৰতিৰক্ষা মন্ত্ৰী ৰাজনাথ সিঙে(Defence Minister Rajnath Singh) অৰুণাচল প্ৰদেশত উল্লেখ কৰে, ‘‘বি আৰ অ’ৰ উপৰিও পথ পৰিবহণ আৰু ঘাইপথ মন্ত্ৰালয়ে এল এ চিৰ(Line of Actual Control) কাষৰীয়া অঞ্চলসমূহত আন্তঃগাঁথনি নিৰ্মাণৰ ক্ষেত্ৰতো গুৰুত্ব দিছে । অৰুণাচল প্ৰদেশৰ সীমান্ত ঘাইপথ এনে এটা প্ৰকল্প যিটো দেশৰ অন্যতম বৃহৎ আৰু কঠিন আন্তঃগাঁথনি প্ৰকল্প ।’’
উল্লেখ্য যে, মুঠ ২০০০ কিলোমিটাৰ দৈৰ্ঘৰ এই সীমান্ত ঘাইপথটোৰ নিৰ্মাণৰ কাম 2022 বৰ্ষৰ পৰা আৰম্ভ হৈছে । ভূটানৰ সমীপৰ মাগোৰ পৰা আৰম্ভ হৈ টাৱাং, আপাৰ সোৱণশিৰি, টুটিং, মেচুকা, আপাৰ ছিয়াং, ডিবাং উপত্যকা, দেছালি, চাগলাগম, কিবেতু আৰু ডঙৰ মাজেৰে পাৰ হৈ ম্যানমাৰ সীমান্তৰ সমীপৰ বিজয়নগৰত শেষ হ’ব এই তথ । এই প্ৰকল্পৰ বাবে আনুমানিক ৪০ হাজাৰ কোটি টকা ব্যয় কৰা হ’ব ।
লগতে প্ৰতিৰক্ষামন্ত্ৰী গৰাকীয়ে, ‘‘চলিত বৰ্ষৰ জুলাই মাহৰ ভিতৰত বি আৰ অ’ই(Border Roads Organization) কৌশলগতভাৱে গুৰুত্বপূৰ্ণ চেলা সুৰংগ নিৰ্মাণ সম্পূৰ্ণ কৰিব পাৰিব । এই সুৰংগ ১৩,৭০০ ফুট উচ্চতাত অৱস্থিত । যোৱা ৫ বছৰত কেৱল BRO য়ে ১৩৫২৫ কিলোমিটাৰ পথ নিৰ্মাণ কৰিছে ৷ মোডী চৰকাৰৰ দিনত সীমান্তৰ আন্তঃগাঁথনিৰ কামে যথেষ্ট গতি লাভ কৰিছে ।’’