তেজপুৰ, ১৫ মাৰ্চ : ৰাজ্যত জিলাই জিলাই খালী কৰা হৈছে শৰণাৰ্থী শিবিৰসমূহ ৷ অসমৰ বিভিন্ন প্ৰান্তৰ লগতে তেজপুৰ জিলা কাৰাগাৰত (Tezpur district jail) কাৰাৰুদ্ধ হৈ থকা ডি ভোটাৰসকলক গোৱালপাৰাস্থিত শৰণাৰ্থী শিবিৰলৈ (Matia detention camp) স্থানান্তৰ কৰা হৈছে ৷
বুধবাৰে তেজপুৰ কাৰাগাৰ কৰ্তৃপক্ষই জনোৱা অনুসৰি তেজপুৰৰ লগতে অসমৰ ছয়খন জিলা কাৰাগাৰত থকা ডি ভোটাৰসকলক গোৱালপাৰা জিলাৰ মাটিয়াত নৱ নিৰ্মিত শৰণাৰ্থী শিবিৰলৈ স্থানান্তৰ কৰা হৈছে ৷ যোৱা দুদিনৰ পূৰ্বে এই পৰ্যন্ত মুঠ ২৯ গৰাকী ডি ভোটাৰক তেজপুৰ কাৰাগাৰৰ পৰা গোৱালপাৰাস্থিত শৰণাৰ্থী শিবিৰলৈ স্থানান্তৰ কৰা হৈছে (29 D voters transfer to Matia detention camp)।
ইয়াৰে ম্যানমাৰৰ ৯ গৰাকী শৰণাৰ্থীৰ ৩ গৰাকী পুৰুষ আৰু ৬ গৰাকী মহিলা আৰু এওঁলোক ৰোহিংগীয়া ৷ আনহাতে বাংলাদেশী ৮ গৰাকীৰ ভিতৰত ৭ জন পুৰুষ ১ গৰাকী মহিলাৰ লগতে মুঠ ১২ গৰাকী বিদেশী ন্যাধিকৰণৰ দ্বাৰা চিনাক্ত কৰা লোক । এতিয়ালৈ অসমৰ তেজপুৰ, গোৱালপাৰা, কোকৰাঝাৰ, যোৰহাট, শিলচৰ আৰু ডিব্ৰুগড়ৰ পৰা মাটিয়াৰ শৰণাৰ্থী শিবিৰলৈ ভালেকেইজন লোকক স্থানান্তৰ কৰা হৈছে ।