আমগুৰিত তিনিটাকৈ মছজিদত একেনিশাই চুৰিকাণ্ড

আমগুৰিৰ নামতিত তিনিটাকৈ মছজিদত দুৰ্বৃত্তৰ চুৰিকাণ্ড ৷ দান-পাত্ৰ ভাঙি চোৰে লুটি নিলে বুজন পৰিমাণৰ ধন ৷

আমগুৰি,17 নৱেম্বৰ: আমগুৰিৰ নামতিত শনিবাৰে একেনিশাই তিনিটাকৈ মছজিদত সংঘটিত চুৰিকাণ্ডই ব্যাপক চাঞ্চল্যৰ সৃষ্টি কৰিছে । যোৱানিশা নামতিত সংঘটিত দুৰ্ঘটনাৰ উত্তেজনা মাৰ নাযাওঁতেই পোহৰলৈ আহিছে উক্ত চুৰিকাণ্ডৰ ঘটনা । চোৰে ধাৰাবাহিকভাৱে নামতি অঞ্চলৰ তিনিটাকৈ মছজিদৰ দান-পাত্ৰ ভাঙি লুট-পাত চলায় ৷ চোৰে নামতি চাৰিআলি বৰ মছজিদ, নামতি আলি মছজিদ আৰু টিং মছজিদৰ দান-পাত্ৰ ভাঙি লুট-পাট চলায় ৷ তিনিটা মছজিদৰ পৰিচালনা সমিতি আৰু স্থানীয় ৰাইজে উল্লেখ কৰা তথ্যনুসৰি চোৰে পাঁচটাকৈ দান-পাত্ৰ ভাঙে । আনহাতে নামতি চাৰিআলি বৰ মছজিদৰ চি চি টিভিত বন্দী হৈছে সমগ্ৰ চুৰিকাণ্ডৰ দৃশ্য ৷ চোৰে দান-পাত্ৰ ভাঙি লক্ষাধিক টকাৰ লুট কৰাৰ সন্দেহ কৰিছে স্থানীয় লোকে । প্ৰকৃততে কিমান পৰিমাণৰ ধন নিবলৈ সক্ষম হৈছে সেইয়া এতিয়ালৈকে সঠিকভাৱে জানিব পৰা হোৱা নাই ৷ চোৰে দানপাত্ৰ ভাঙিবলৈ ব্যৱহাৰ কৰা এডাল লোৰ ৰ'ড ঘটনাস্থলীতে এৰি থৈ যোৱা প্ৰত্যক্ষ কৰে স্থানীয় ৰাইজে ৷

ইতিমধ্যে ঘটনা সন্দৰ্ভত তিনিওটা মছজিদৰ পৰিচালনা সমিতিয়ে নামতি থানাত এজাহাৰ দাখিল কৰিছে ৷ ইফালে চিচি টিভিত বন্দী হোৱা চুৰিকাণ্ডৰ দৃশ্য তদন্তৰ সুবিধাৰ্থে জিলা প্ৰশাসনক অৰ্পণ কৰা হ'ব বুলি অৱগত কৰে মছজিদ পৰিচালনা সমিতিয়ে ৷

আৰু পঢ়কআমগুৰি নামতিত ভয়ংকৰ পথ দুৰ্ঘটনা, মৃত্যু দুজনৰ