শিৱসাগৰ,২৮ ছেপ্টেম্বৰ :শিৱসাগৰ কালুগাঁৱত দিন দুপৰতেই সংঘটিত হৈছে এক চাঞ্চল্যকৰ ঘটনা ৷ বাকীৰ ধন বিচাৰি যোৱা পেভাৰ ব্লক ফেক্টৰীৰ কৰ্মচাৰীক বন্দুক দেখুৱাই ভাবুকি দিয়াৰ অভিযোগ এগৰাকী ব্যক্তিৰ বিৰুদ্ধে । পাহীগাঁৱৰ ৰমেন হাতীমূৰীয়াৰ বিৰুদ্ধে এই গুৰুত্বৰ অভিযোগ উঠিছে ৷
শিৱসাগৰত দিনদুপৰতে বন্দুক দেখুৱাই হত্যাৰ ভাবুকি দুজন লোকক
বন্দুক দেখুৱাই ভাবুকি দিয়াৰ সন্দৰ্ভত জয়সাগৰ আৰক্ষী চকীত এজাহাৰ দাখিল কৰিলে ভুক্তভোগী কৰ্মচাৰী অকনি হাতীমূৰীয়া আৰু চন্দন টায়ে ৷ জয়সাগৰৰ ক্ষুদ্ৰ ব্যৱসায়ী মৃন্ময় চেতিয়াৰ পেভাৰ ব্লক নিৰ্মাণকাৰী প্ৰতিস্থানটোৰ কৰ্মচাৰীদ্বয় অকনি আৰু চন্দনে পুৱা স্বত্বাধিকাৰীৰ নিৰ্দেশত এবছৰ ধৰি অনাদায় হৈ থকা ৪ হাজাৰ টকা বিচাৰি ৰমেন হাতীমূৰীয়াৰ বাসগৃহত উপস্থিত হৈছিল ৷ কিন্তু হঠাৎ ৰমেন হাতীমূৰীয়াই গেট বন্ধ কৰি দুয়োজন কৰ্মচাৰীক গুলীয়াবলৈ এটা দীঘল বন্দুক উলিয়াই খেদি অহাৰ অভিযোগ তুলিছে কৰ্মচাৰী কেইজনে ।