শিৱসাগৰত কেন্দ্ৰীয়ভাৱে আয়োজন বীৰাংগনা সতী সাধনী স্মৃতি দিৱস

আহোমৰ লগত হোৱা শেষ ৰণত পৰাজয়ৰ পাচতো আত্মসমৰ্পণ নকৰি স্বদেশ আৰু স্বজাতিৰ মৰ্যাদা অক্ষুন্ন ৰাখি সাহসিকতাৰ পৰিচয় দিয়া মহিয়সী নাৰীগৰাকীক সশ্ৰদ্ধ সোঁৱৰণ অসম চৰকাৰৰ ৷

শিৱসাগৰ, 21 এপ্ৰিল : ৰাজ্যৰ ভিন্ন প্ৰান্তৰ লগতে শিৱসাগৰতো সশ্ৰদ্ধ সোঁৱৰণ চুতীয়া ৰাণী বীৰাংগনা সতী সাধনীক ৷ চুতীয়া জাতিৰ স্বাভিমানৰ প্ৰতীক বীৰাংগনা ৰাণী সতী সাধনীৰ স্মৃতি দিৱস অতি আড়ম্বৰপূৰ্ণ আয়োজন কৰা হয় শিৱসাগৰ নগৰত ৷ অসম চৰকাৰৰ সাংস্কৃতিক সঞ্চালকালয়ৰ উদ্যোগত সদৌ চুতীয়া জাতি সন্মিলন,সদৌ চুতীয়া জাতি মহিলা সন্মিলন,চুতীয়া যুৱ সন্মিলন, সদৌ অসম চুতীয়া ছাত্ৰ সন্থা আৰু শিৱসাগৰ জিলা প্ৰশাসনৰ সহযোগত স্থানীয় বৰ্ডিং খেলপথাৰত কেন্দ্ৰীয়ভাৱে আয়োজন কৰা হয় স্মৃতি দিৱসৰ ৷ দেওবাৰে পুৱাই বৃক্ষ ৰোপণ,স্মৃতি তৰ্পণ,সংকল্প গ্ৰহণ আদি কাৰ্যসূচীৰ লগতে জাতি-জনগোষ্ঠীৰ সংস্কৃতি প্ৰতিফলন কৰা সাংস্কৃতিক শোভাযাত্ৰা বাহিৰ কৰা হয় নগৰখনত ৷

বিয়লি অনুষ্ঠিত মুকলি সভাত মুখ্যমন্ত্ৰী সৰ্বানন্দ সোণোৱাল উপস্থিত থকাৰ কথা আছিল যদিও নিৰ্বাচনী ব্যস্ততাৰ বাবে উপস্থিত থাকিব নোৱাৰাত চৰকাৰক প্ৰতিনিধিত্ব কৰি উক্ত অনুষ্ঠানত উপস্থিত থাকে সাংস্কৃতিক পৰিক্ৰমা মন্ত্ৰী নৱ কুমাৰ দলে ৷ উক্ত অনুষ্ঠানত উপস্থিত থাকি স্মৃতি দিৱস উপলক্ষে প্ৰকাশিত স্মৃতিগ্ৰন্থ 'সৌমাৰ ৰতন" উন্মোচন কৰি মন্ত্ৰীগৰাকীয়ে কয় যে, চুতীয়া জাতিৰ লগতে অসমীয়াৰ বাবে আদৰ্শস্বৰূপ এইগৰাকী মহিয়সী নাৰীৰ আদৰ্শক সাৰোগত কৰি যাতে ৰাজ্যৰ নৱ প্ৰজন্ম আগুৱাই যাব পাৰে তাৰ বাবে আড়ম্বৰপূৰ্ণভাৱে আয়োজন কৰা হৈছে এই দিৱসৰ ৷