মূল্যবৃদ্ধিৰ বিৰুদ্ধে তীব্ৰ প্ৰতিবাদৰ হুংকাৰ সংগ্ৰামী যুৱ ছাত্ৰ পৰিষদৰ

ক'ভিডসৃষ্ট পৰিস্থিতিৰ মাজতে অতি ভয়াবহভাৱে বৃদ্ধি পোৱা মূল্যবৃদ্ধিৰ বিৰুদ্ধে সৰৱ হৈছে সংগ্ৰামী যুৱ ছাত্ৰ পৰিষদ ৷ শীঘ্ৰে মূল্যবৃদ্ধি নিয়ন্ত্ৰণৰ বাবে ব্যৱস্থা গ্ৰহণ নকৰিলে প্ৰতিবাদৰ হুংকাৰ সংগঠনটোৰ ৷ আৰক্ষীৰ শেহতীয়া এনকাউণ্টাৰ সন্দৰ্ভতো তীব্ৰ প্ৰতিক্ৰিয়া প্ৰকাশ সংগঠনটোৰ ৷

শিৱসাগৰ, 12 জুলাই:অত্যাৱশ্যকীয় সামগ্ৰীৰ মূল্যবৃদ্ধি, আৰক্ষীৰ শেহতীয়া এনকাউণ্টাৰ আৰু ৰাজ্যখনৰ কেইবাটাও বিষয়ক লৈ সৰৱ হৈ উঠিছে সংগ্ৰামী যুৱ ছাত্ৰ পৰিষদ ৷ সোমবাৰে শিৱসাগৰ প্ৰেছ ক্লাবত এখন সংবাদমেল সম্বোধন কৰি এই বিষয়সমূহক লৈ সৰৱ হৈ পৰে পৰিষদৰ সভাপতি দেৱজিৎ দত্ত ৷ চৰকাৰক অতি শীঘ্ৰে আকাশলংঘী মূল্যবৃদ্ধি নিয়ন্ত্ৰণৰ বাবে ব্যৱস্থা গ্ৰহণৰ আহ্বান জনাই ইয়াৰ অন্যথা তীব্ৰ প্ৰতিবাদৰ সন্মুখীন হোৱাৰ বাবে সাজু থাকিবলৈ চৰকাৰক সকীয়াই দিয়ে সংগঠনটোৱে ৷

ক'ভিডৰ গ্ৰাসত পৰা দৰিদ্ৰসকলক চৰকাৰে সামান্যতমো আৰ্থিক সাহায্য নিদিয়াত ক্ষোভ প্ৰকাশ কৰি পৰিষদে দৰিদ্ৰ পৰিয়ালক অতি কমেও পাঁচ হেজাৰ টকাকৈ সাহাৰ্য প্ৰদানৰ দাবী জনায় ৷ ইয়াৰ লগতে পেট্ৰ'ল, ডিজেলকে ধৰি অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাত চৰকাৰ চূড়ান্তভাৱে ব্যৰ্থ হোৱা বুলি সমালোচনা পৰিষদৰ ৷

উল্লেখ্য যে,শিৱসাগৰ জিলা যোগান বিভাগে অসাধু ব্যৱসায়ী চক্ৰক নিয়ন্ত্ৰণ কৰাত বিফল হোৱা বুলিও সমালোচনা কৰিছে সংগ্ৰামী যুৱ ছাত্ৰ পৰিষদে ৷ লগতে তৎকালীনভাৱে আকাশলংঘী মূল্যবৃদ্ধি ৰোধ নকৰিলে ৰাজপথত নামিবলৈ বাধ্য হ'ব বুলি সংবাদমেলখনৰ জড়িয়তে হুংকাৰ দিছে পৰিষদে ৷ আনহাতে সোমবাৰৰ পৰা আৰম্ভ হোৱা বাজেট অধিৱেশন কালতে শিৱসাগৰৰ পৰ্যটন উদ্যোগৰ বাবে আৰ্থিক পেকেজৰ ব্যৱস্থা কৰিবলৈ দাবী জনাইছে সংগঠনটোৱে ৷ এই ক্ষেত্ৰত শিৱসাগৰৰ বিধায়ক অখিল গগৈয়ে যি পৰিকল্পনা কৰিছে সেই পৰিকল্পনা বাস্তৱ কৰিবলৈ চৰকাৰক সহযোগ কৰিবলৈ আহ্বান জনাইছে পৰিষদে ৷

ইপিনে শিৱসাগৰৰ ঐতিহাসিক শিৱ দৌলৰ চৌহদত থকা গছ সমূহ কাটি পেলোৱা কাৰ্যকো তীব্ৰ গৰিহণা দি দৌল কমিটিয়ে নিজৰ মাজতে আলোচনা কৰি মইমতালিৰে গছ কটা বুলি অভিযোগ উত্থাপন কৰিছে পৰিষদে । ৰাজ্যত সম্প্ৰীতি বাচ-বিচাৰ নকৰাকৈ আইন উলংঘা কৰি আৰক্ষীয়ে হত্যা যজ্ঞ চলোৱা বুলি সমালোচনা কৰিছে পৰিষদৰ সদস্যসকলে ৷

বিভিন্ন অপৰাধত অভিযুক্তসকলক আদালতৰ কাঠগড়াত থিয় নকৰাই আৰক্ষীয়ে এনকাউণ্টাৰ কৰাটো কেতিয়াও গ্ৰহণযোগ্য হ'ব নোৱাৰে বুলিও ক্ষোভ প্ৰকাশ কৰে পৰিষদে ৷ আনহাতে সংবাদমেলত ৰাইজৰ দল আৰু বীৰ লাচিত সেনাৰ মাজত হোৱা বিতৰ্ককলৈও মত প্ৰকাশ কৰিছে পৰিষদে ৷ অখিল গগৈক শিৱসাগৰ সমষ্টিত জয়ী কৰোৱা কৃতিত্ব কেৱল এটা বা দুটা সংগঠনৰ নহয়, সকলো ৰাইজৰ কৃতিত্ব বুলি মন্তব্য কৰিছে পৰিষদৰ সভাপতি দেৱজিৎ দত্তই ৷

লগতে পঢ়কঃবিধানসভাত উত্থাপিত হ’ল বিতৰ্কিত গো-সুৰক্ষা বিধেয়ক