আমগুৰি, 8 ছেপ্টেম্বৰ :আমগুৰিত শিল পৰিবাহী ডাম্পাৰৰ খুন্দাত এজন লোক নিহত হোৱাক লৈ বুধবাৰে উত্তপ্ত পৰিস্থিতিৰ সৃষ্টি হয় ৷ নিহত লোকজন স্থানীয় কৃষ্ণ গগৈ বুলি জানিব পৰা হৈছে ৷ আমগুৰিৰ নগা আলি হাতীমুৰীয়াত ধোদৰ আলিত সংঘটিত হয় এই দুৰ্ঘটনা ৷
নিহত কৃষ্ণ গগৈয়ে ঘৰৰ ওচৰতে খোজকাঢ়ি গৈ থকা অৱস্থাত নাজিৰাৰ দিশৰ পৰা আমগুৰি নগৰ অভিমুখী এ এচ ০১ এম চি ৯৩৪১ নম্বৰৰ তীব্ৰবেগী ডাম্পাৰখনে নিয়ন্ত্ৰণ হেৰুৱাই লোকজনক খুন্দা মাৰি পথৰ ওপৰত বাগৰি পৰে ৷ এই দুৰ্ঘটনাত কৃষ্ণ গগৈ গাড়ীখনৰ তলত সোমাই যোৱাত থিতাতে মৃত্যু হয় ৷ এই পৰ্যন্ত গাড়ীৰ চেপাতে আবদ্ধ হৈ আছে নিহত লোকজনৰ পাৰ্থিৱ শৰীৰ ।