অকলশৰীয়া আইতাই ক্ষণ গণিছে জীৱনৰ আমগুৰি, ৩০ অক্টোবৰ : উৰুখা পঁজাত এগৰাকী অকলশৰীয়া আইতা ৷ আৰ-তাৰ পৰা খুজি-মাগি মোকলায় পেটৰ ভাত মুঠি ৷ ৰ’দে-বৰষুণে এটা উৰুখা পঁজাতে অকলশৰীয়া আইতাগৰাকীয়ে ক্ষণ গণিছে জীৱনৰ ৷ আমি উল্লেখ কৰা ষাঠি উৰ্দ্ধৰ এই অকলশৰীয়া আইতাগৰাকীৰ নাম ব’হাগী গগৈ ৷
আমগুৰি ভূঞাহাট চৰাইমূৰীয়া গাঁৱৰ ১০ নং ৱাৰ্ডৰ ষাঠি উৰ্দ্ধৰ এই ব’হাগী আইতাই আজিলৈকে লাভ কৰা নাই চৰকাৰৰ কোনো এখন আঁচনিৰে সুবিধা ৷ আইতাগৰাকীয়ে নাজানে অৰুণোদয় আঁচনি কি নাইবা বিধবা পেঞ্চন কি ৷ ফলত কেৱল বাৰীৰ কচু, ঢেকীয়াৰেই জীৱন অতিবাহিত কৰিছে আইতাগৰাকীয়ে ৷
ইফালে এই অকলশৰীয়া আইতাগৰাকীৰ কথা যোৱা বহু বছৰ ধৰি স্থানীয় লোকসকলে সমষ্টিটোৰ বিধায়কৰ লগতে ভূঞাহাট গাঁও পঞ্চায়তক সহায় কৰিবলৈ আহ্বান জনাই আহিছে ৷ কিন্তু এই ক্ষেত্ৰত আইতাগৰাকীক কোনো এজন লোকে সহায় কৰিবলৈ ওলাই নহাৰো অভিযোগ তুলিছে স্থানীয় ৰাইজে ৷
উল্লেখ্য যে, চৰকাৰে দৰিদ্ৰজনৰ বাবে ঘোষণা কৰিছে বহু আঁচনি ৷ কিন্তু আঁচনিসমূহ কেৱল যেন ৰঙীন বিজ্ঞাপনৰ মাজতেই এতিয়া সীমাৱদ্ধ । কিয়নো বিভিন্ন সময়ত পোহৰলৈ অহা দৰিদ্ৰ জনতাৰ সমস্যাৰ দৃশ্যই তাকেই প্ৰতিফলিত কৰে । উদাহৰণ আমগুৰি ভূঞাহাট চৰাইমূৰীয়া গাঁৱৰ এই ব’হাগী আইতা ৷ এই ভাষ্য আমগুৰিবাসী ৰাইজৰ ৷
আমগুৰিৰ এজন সচেতন যুৱকে উল্লেখ কৰা অনুসৰি, কচু, ঢেকীয়া খাই দিন পাৰ কৰা আইতাগৰাকীৰ উৰুখা পঁজাৰ চালেৰে আকাশৰ জোন, তৰা গণিব পৰা যায় । বৰ্তমানলৈকে এটা চৰকাৰী আৱাস গৃহৰ সুবিধা লাভ নকৰা এই আইতাগৰাকীৰ দুগৰাকী কন্যা আছিল যদিও বিবাহপাশত আৱদ্ধ হোৱাৰ পিচতে অকলশৰীয়া হৈ পৰে তেওঁ ।
বৰ্তমান আইতাগৰাকীৰ অৱস্থা তেনেই শোচনীয় ৷ সেয়ে স্থানীয় লোকে মুখ্যমন্ত্ৰী ড৹ হিমন্ত বিশ্ব শৰ্মাক ব’হাগী গগৈ নামৰ আইতাগৰাকীক চৰকাৰী সুবিধা প্ৰদান কৰিবৰ বাবে সংবাদ মাধ্যমৰ জৰিয়তে আহ্বান জনাইছে ।
লগতে পঢ়ক :Old couple Story: এহাল ককা-আইতাৰ জীৱন সংগ্ৰাম
