চৰাইদেউ, 19 এপ্ৰিল: কৰ'ণা মহামাৰীক প্ৰতিৰোধৰ বাবে দেশজুৰি অব্যাহত আছে লক ডাউন ৷ জনসাধাৰণক এই মহামাৰীৰ পৰা ৰক্ষা কৰাৰ উদ্দেশ্যে প্ৰশাসনে প্ৰদান কৰিছে বহু নিৰ্দেশনা ৷ কিন্তু প্ৰশাসনৰ নীতি নিৰ্দেশনাক অৱমাননা কৰি গোপনে ব্যৱসায় চলাইছে কিছু অসাধু লোকে ৷ শুকুৰবাৰে শিৱসাগৰত এখন অবৈধ পাচলি ভৰ্তি ট্ৰাক জব্দ হোৱাৰ পাছতে শনিবাৰে নিশা পুনৰ চৰাইদেউ আৰক্ষীয়ে সোণাৰিত আটক কৰিলে বহিঃ জিলাৰ পৰা শাক-পাচলি সৰবৰাহ কৰা চাৰি অসাধু ব্যৱসায়ীক ৷
উল্লেখ্য যে সোণাৰি আঞ্চলিক ছাত্ৰ সন্থা, বিজেপি যুৱ মৰ্চা আৰু সোণাৰিৰ একাংশ সাংবাদিকৰ অভিযোগৰ ভিত্তিত চৰাইদেউ আৰক্ষীয়ে অভিযান চলাই আটক কৰে ব্যৱসায়ী কেইজনক ৷ AS-02CC-1751 নম্বৰৰ এখন ডি আই গাড়ীসহ আৰক্ষীয়ে আটক কৰে সোণাৰিৰ জিয়াউৰ আহমেদ,খছৰুল ইছলাম, নগাঁৱৰ চাহিদ আহমেদ আৰু লংপতীয়াৰ প্ৰশান্ত মহন্তক ৷ উল্লেখ্য যে,কৰ'ণাৰ ৰেড জ'ন হিচাপে চিহ্নিত নগাঁও জিলাৰ পৰা গ্ৰীণ জ'নলৈ অৰ্থাৎ চৰাইদেউ জিলাত শাক-পাচলি সৰবৰাহ কৰিছিল ব্যৱসায়ী কেইজনে ৷ ইয়াৰ উপৰিও অভিযানৰ সময়ত খচৰুল ইছলাম নামৰ ব্যৱসায়ী জনৰ সোণাৰি নগৰস্থিত শাক-পাচলিৰ গোদাম ছীল কৰা লগতে এখন মিনি ট্ৰাক জব্দ কৰে আৰক্ষীয়ে ৷
লগতে পঢ়কঃ বিলাসীপাৰাত ধুমুহাৰ তাণ্ডৱ